Sýretterdi túsirgen – Erlan OMAR, «EQ»
Daryndy oqýshylar ekojobalar kórmesinde ózderiniń ǵylymı jumystary týraly egjeı-tegjeıli aıtyp berdi. Máselen, Álimhan Ermekov atyndaǵy №98 mektep lıseıiniń 10-synyp oqýshysy Ámına Ǵumyrbek orman órtiniń aldyn alýǵa kómektesetin drondardy tanystyrdy.
«Jobamnyń ataýy – «FeuSol». Bul drondyq júıe orman órtine monıtorıng júrgizip, órttiń aldyn alýǵa jáne ony óshirýge baǵyttalǵan. Sonymen qatar bul dron ormanda joǵalǵan adamdardy taýyp, zań buzýshylardy anyqtaýǵa kómektesedi. Odan bólek, shaǵyn aýmaqtarǵa, saıabaqtarǵa ınternet taratyp, «Qyzyl kitapqa» engen janýarlardyń qozǵalysyn baqylaıdy. Men osy jobamdy Vetnamda ótken halyqaralyq baıqaýda tanystyryp, júldeli ekinshi oryn aldym», dedi Ámına Ǵumyrbek.
Al Álkeı Marǵulan atyndaǵy №40 mektep-lıseıiniń 5-synyp oqýshylary Nurbaqyt Ermekuly men Aızat Shaıahmet Esil ózeniniń ekologııalyq jaǵdaıyn jaqsartýǵa baǵyttalǵan jobalaryn kópshilik nazaryna usyndy. Qazirgi tańda ózen jylyna bir ret qana tazalanatyndyqtan, oqýshylar ony jylyna 5-6 ret tazartý qajet ekenin alǵa tartty. Sonymen qatar qorǵanysh temir torlar ornatý arqyly qoqysty azaıtýǵa bolatynyn dáleldedi.
Jıyn barysynda mektepke plastık bótelkelerdi qabyldaıtyn fondamat pen qoqys suryptaýǵa arnalǵan ekobokstar qoıyldy. «EcoQolday» júıesiniń kómegimen oqýshylar qaldyqtardy durys kádege jaratyp qana qoımaı, ekologııalyq konkýrsqa qatysa alady. Jezqazǵan mektepterinde qaǵaz, shyny jáne plastık jınaýǵa arnalǵan ekobokstar ornatylyp qoıǵan jáne bul tájirıbe jaqyn arada Astananyń barlyq mektebine taratylmaq. «EcoQolday» júıesi aıasynda eń kóp qaıta óńdeletin materıal tapsyrǵan mektepter arnaıy júldelermen marapattalady.
– «Taza Qazaqstan» aksııasynyń máni men mańyzy óte zor. Onyń basty maqsaty – ekologııalyq mádenıetti qalyptastyrý. Biz jyl saıyn elimizde 4,5 mıllıon tonna qoqys jınalatynyn eskersek, bul máseleniń qanshalyqty ózekti ekenin túsinemiz. Kúndelikti ómirde qoldanatyn zattardyń qaldyqtary, plastıkter, qaǵazdar, túrli qaptamalar durys suryptalmaǵan jaǵdaıda qorshaǵan ortaǵa orasan zııan tıgizedi. Búgingi kezdesýde oqýshylar ekologııa salasyndaǵy ınnovasııalyq jobalaryn tanystyryp, óz oılaryn ortaǵa salyp jatyr. Bul – óte quptarlyq jaǵdaı. Biraq jas ónertapqyshtar men oqýshylardyń ǵylymı-zertteý eńbekteri tek mektep deńgeıinde qalyp qoımaı, óndiriske engizilýi tıis. Bıylǵy kóktemde mınıstrlik mektepterge kógaldandyrý jumystaryn júrgizýge arnaıy kóshetter bólgen edi. Aldaǵy ýaqytta bul bastama jalǵasyn taýyp, elimizdiń túkpir-túkpirinde ekologııalyq jobalar júzege asyrylmaq, – dedi Ekologııa jáne tabıǵı resýrstar mınıstri Erlan Nysanbaev.
