Sýretti túsirgen – Ádil ÁBILTAEV
Osydan úsh jyl buryn Jetisý oblysy qurylǵan shaqta óńirdiń ekonomıkalyq qýatyn eskere otyryp, chılılik kásipkerler seriktes bolýǵa nıetti ekenin jetkizgen.
«Sizdermen seriktes bolýǵa peıildimiz. Degenmen koronavırýsty jáne basqa da sebepterdi alǵa tartyp, keı jobalardyń iske asyrylýyn uzatyp alǵan ınvestorlar da bar. Bizge jobalardyń ýaqytynda júzege asyrylǵany jáne onyń óz tıimdiligin kórsetkeni kerek. Ol úshin biz jergilikti atqarýshy organǵa qatysty jumystardy der kezinde atqarýǵa múddelimiz. О́zińiz atap ótken barlyq qujattyq rásimder aıaqtalǵanda taǵy bir kezdesip, jobanyń jaı-japsaryn egjeı-tegjeıli talqylaýǵa ázirmiz», degen edi oblys ákimi B.Isabaev sol tusta.
Mine, búginde sol jobany júzege asyrý maqsatynda Astana qalasynda «KAZ Minerals toby» men chılılik «Compania Electro Metalurgica SA» (ME Elecmetal) kelisimshartqa qol qoıdy. Atalǵan resmı sharaǵa elimizdiń О́nerkásip jáne qurylys mınıstrliginiń basshylyǵy, elshilik ókilderi, kompanııalar qyzmetkerleri, Jetisý oblysy ákiminiń orynbasary Áset Qanaǵatov qatysty. Á.Qanaǵatov jobany iske asyrýdyń barlyq kezeńinde jergilikti atqarýshy organ tarapynan zań aıasynda qajetti qoldaý kórsetiletinin jetkizdi.
«Jetisý aımaǵynyń logıstıkalyq múmkindikteri mol. «Taldyqorǵan» ındýstrıaldy aımaǵynda óndiristi damytýǵa qajetti barlyq ınfraqurylym júıeleri jasalǵan. Bul óz kezeginde óńirdiń ınvestısııalyq tartymdylyǵyn arttyrýǵa múmkindik beredi. Jobanyń aımaqqa tıimdiligi turǵysyndaǵy birqatar jaıttar pysyqtaldy. О́z tarapymyzdan qajetti qoldaý kórsetemiz. Jańa zaýyt óńirdiń ekonomıkalyq qýatyn arttyrýda kóp kómek bolady degen oıdamyn», deıdi Á.Qanaǵatov.
«ME-Elecmetal» kompanııasy – taý-ken óndirisi salasynda dıirmen qaptamalaryn shyǵarýda óndiristik qýaty men ónim shyǵarý kólemi jaǵynan álemde kóshbasshy. Kompanııa shıkizatty Qytaıdaǵy ken ornynan tasymaldap, Jetisý óńirinde óńdeý isimen aınalyspaq. Olardyń jylyna 100-140 myń tonna joǵary sapaly ónim óndirý jospary bar.
«KAZ Minerals» kompanııasymen kelisimshart jasadyq. Sizderge usynylyp otyrǵan jobamyzdy dırektorlar keńesi bizge bekitip berdi. Sodan keıin naqty qadamdar jasalady. Jahandyq pandemııa saldarynan kóptegen joba keshigip júzege asyp jatyr. Jetisý – ınvestorlarǵa qolaıly aımaq. Jańa bastama óz jemisin beretinine senimdimin», deıdi «ME-Elecmetal» birlesken kompanııasynyń ókili, usatý bóliminiń aǵa atqarýshy vıse-prezıdenti Zen Jý myrza.
Jobaǵa qatysty jumys oblys basshylyǵy tarapynan byltyrdan beri júrgizilip keledi. Oblystyq Kásipkerlik jáne ındýstrııalyq-ınnovasııalyq damý basqarmasynyń aqparatyna qaraǵanda, jańa zaýyt Taldyqorǵan qalasynda salynady. Eksportqa baǵyttalǵan kásiporyn 2028 jyly iske qosylýy múmkin. Zaýyt shyǵaratyn tegisteý sharlary Kerbulaq aýdanyndaǵy «Shoǵyrlandyrylǵan qurylys taý-ken kompanııasy» JShS metallýrgııalyq kombınatynyń mys jáne mys ónimderin óndirýi barysynda da qoldanylmaq.
Jetisý oblysy
