Foto: shutterstock
26 naýryz kúni arnaıy komıssııa Jaýǵashty áıelder kolonııasyndaǵy balalardyń ýlanýy týraly aqparatty teksergen. Tekseris jumystaryna densaýlyq saqtaý basqarmasy, arnaıy prokýror, sanıtarlyq-epıdemıologııalyq baqylaý qyzmeti jáne QAJD ókilderi qatysqan.
Nátıjesinde 14 balanyń ýlanǵany týraly aqparat rastalmaǵan. Alaıda, 22-23 naýryz aralyǵynda úsh bala Ile aýdandyq ortalyq aýrýhanasynyń juqpaly aýrýlar bólimine «enterovırýstyq ınfeksııa, 0-1 dárejeli sýsyzdaný» dıagnozymen túsken.
«Olardyń jaǵdaıy ortasha aýyrlyqta, oń dınamıka baıqalady. Bir bala bastapqyda jansaqtaý bóliminde boldy, keıin juqpaly aýrýlar bólimine aýystyryldy. Qazir eki bala anasymen birge juqpaly bólimde, bireýi – anasyn emdeý kezinde oǵan kútim jasap jatqan meıirgerdiń baqylaýynda bolady», delingen habarlamada.
Dárigerler balalar úıindegi barlyq tárbıelenýshiler tolyq medısınalyq tekseristen ótkenin, olardan ınfeksııa belgileri anyqtalmaǵanyn málimdegen. Búginde balalar úıinde 63 sottalǵan áıel óz balalarymen birge turyp jatyr. Onyń ishinde 14 bala – eńbektep júretin topta.
Esterińizge sala keteıik, buǵan deıin quqyq qorǵaýshy Aıman Omarova áleýmettik jelide balalardyń jappaı ýlanǵany jáne analarynyń olarmen kezdese almaı jatqany týraly aqparat taratqan edi.
