Foto: A.Baıjumanov
Otyrys barysynda Palata depýtattary «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zańdy eki oqylymda qarady. Atalǵan zań sporttyń basym túrlerin aıqyndaýǵa, olardy qarjylandyrýǵa jáne dene shynyqtyrý jáne sport sýbektilerimen ózara is-qımylǵa baǵyttalǵan. Sondaı-aq qujat normalary dene shynyqtyrý jáne sport salasyn retteýdiń normatıvtik negizin tujyrymdamalyq turǵydan ózektendirýge múmkindik beredi jáne ulttyq zańnamany, onyń quqyq qoldaný praktıkasyn odan ári jetildirýge yqpal etedi.
«Sońǵy jyldarda elimizde sport salasyn damytýǵa basa mán berilip keledi. Prezıdentimiz Qasym-Jomart Kemeluly Toqaev Ulttyq quryltaıdyń IV otyrysynda sportty damytý máselesine erekshe kóńil bóldi. Búgin qaralǵan zań – sport salasyn basqarýdy jetildirý baǵytynda iske asyrylyp jatqan mańyzdy qadamdardyń biri. Zańda sport salasyna bólinetin bıýdjet qarajatyn tıimdi paıdalanýdy qamtamasyz etetin erejeler qamtyldy. Ulttyq sport túrleri basym sport túrleriniń qataryna qosyldy. Sportshylar men bapkerlerge memlekettik áleýmettik qoldaý kórsetý tártibin jetildirýge arnalǵan jekelegen túzetýler de engizildi. Maquldanǵan zań salamatty ómir saltyn nasıhattaýǵa, azamattardy, ásirese, balalardy sportqa baýlýǵa jáne joǵary sporttyq jetistikterge qol jetkizýge oń septigin tıgizedi dep senemiz», dedi Máýlen Áshimbaev.
Atalǵan qujatta ulttyq sporttyq medısına jáne ońaltý uıymynyń qyzmetin zańnyń jeke babynda reglamentteý kózdelgen. О́zgerister respýblıkalyq jáne óńirlik sport federasııalarynyń mártebesine de áser etedi. Naqty aıtqanda, olar ulttyq sport federasııalary bolyp ózgertiledi.
Sondaı-aq balalar-jasóspirimder sporttyq bilim berý uıymdarynyń jattyqtyrýshy-oqytýshylary úshin aptasyna 18 saǵattyq normatıvtik oqý júktemesi engiziledi. Al, Qazaqstan azamaty bolyp tabylmaıtyn sportshylardy bıýdjet qarajaty esebinen qarjylandyrýǵa tyıym salynady.
Budan basqa, birqatar salalyq zańdardyń zańnamalyq aktilerdiń maqsattaryn, mindetteri men qaǵıdattaryn aıqyndaý bóligine ózgerister men tolyqtyrýlar engiziledi.
Sonymen qatar Palata otyrysynda senator Andreı Lýkın depýtattyq saýal joldaǵan. Ol jer resýrstaryn paıdalanýdy memlekettik baqylaý salasyndaǵy problemalarǵa nazar aýdaryp, atalǵan túıtkilderdi joıýǵa qatysty naqty sharalar usynǵan. Onyń ishinde Jer resýrstaryn basqarý jónindegi komıtetti taraptardyń biri onyń aýmaqtyq organdary bolǵan sot aktilerine aı saıynǵy monıtorıng júrgizýge jáne anyqtalǵan buzýshylyqtardy jedel joıýǵa mindetteý jóninde usynys bar.
