Sýretti túsirgen – Valerıı Býgaev
Naýryz merekesi qarsańynda oblys turǵyndary Estaı atyndaǵy mádenıet saraıynda álemdik opera juldyzy Marııa Mýdrıak pen «Astana balet» teatry sımfonııalyq orkestriniń konsertin tamashalady.
Baǵdarlamada ıtalııalyq opera, aýstrııalyq operettanyń romantıka jáne ıspanııalyq sarsýela janryndaǵy úzdik shyǵarmalar oryndaldy.
– Maǵan ózim týyp-ósken Pavlodarymda konsert berýge múmkindik berilgenine óte qýanyshtymyn. Sondaı-aq «Astana balet» teatryna ózderiniń sımfonııalyq orkestrimen birge óner kórsetýge taǵy bir múmkindik bergenine alǵysymdy bildiremin. Búgin sahnada eń áýeli óz repertýarymdaǵy shyǵarmalardy oryndadym. Mosart pen Verdıden jáne merekelik kóńil kúı syılaıtyn, jeńil aýandaǵy týyndylardan, máselen, Ardıtı, Legardyń kompozısııalary bar. Bul operany súıetin qaýymǵa ǵana emes, mundaı konsertke alǵash ret kelip otyrǵan kórermenderge de unady degen oıdamyn, – dedi Marııa Mýdrıak.
О́ner ıesi tyńdarmandardy áldebir sanatqa bólý degen uǵymnan ada bolý kerek ekenin jetkizdi. Bir adam ba, álde myń adam ba, bastysy kez kelgen aýdıtorııada barynsha tamasha etip óner kórsetse, maqsatynyń oryndalǵany dep biledi eken. Ári konsertte meılinshe kóbirek án shyrqaǵandy jany qalaıtynyn, konsert repertýary daýys máneriniń qalaısha damıtynymen tyǵyz baılanysty ekenin atap ótti.
«Men daýysymdy únemi baqylap otyramyn, soǵan oraı qaı partııanyń qaı týyndydan keıin oryndalatynyn konsert barysynda júre josparlaımyn. Mundaı partııalardyń sany óte kóp», dedi ánshi.
Álemdik mamandar Marııanyń daýsyn qazirgi zamannyń eń ádemi jáne biregeı daýystarynyń biri dep tanıdy. Biregeı daýys ıesi opera ánshileriniń álemdik TOP-10-dyǵyna engen. Sondyqtan merekelik konsertti Pavlodar oblysynyń ǵana emes, elimizdiń de jarqyn mádenı oqıǵasy bolǵanyn aıtar edik.
Aıtyp óteıik, Marııa Mýdrıak án aıtýdy úsh jasynan bastaǵan. 5 jasynda Pavlodar qalasynyń №1 mýzykalyq mektebine oqýǵa túsedi. Al 13 jasynda Djýzeppe Verdı atyndaǵy Mılan memlekettik konservatorııasyna túsip, «La Skala» teatrynyń qoıylymdaryna qatysty.
Pavlodar oblysy
