Berdibek Máshbekulynyń Áýlıeatanyń áleýetin kóterýdegi eren eńbegin, kúrdeli máselelerdi tap basqan, san salaǵa serpin syılaǵan batyl bastamalary men jobalaryn Jambyl jurty joǵary baǵalaıdy. Sebebi ol kisi óńirdiń tizginin qıyn shaqta qolǵa aldy.
Berekeli jurttyń birligine qaýip tóngen «Qordaı oqıǵasyna» baılanysty Prezıdent Qasym-Jomart Toqaevtyń tapsyrmasymen oqıǵa ornyna memlekettik komıssııany bastap kelgen Berdibek Máshbekulyna búlingendi bútindep, qıraǵandy qalpyna keltirý ǵana emes, el arasyndaǵy tatýlyq pen birlikti nyǵaıtýdyń aıryqsha mıssııasy júkteldi. Bekeń kele sala endi mundaı jaǵdaıdyń qaıtalanbaýyn qadaǵalaıtyn «Beıbitshilik pen kelisim» jobasyn qurdy. Qordaıdaǵy eldi mekender kógildir otynmen tolyq qamtyla bastady. Aýyzsý, turǵyn úı, jol qurylysy jáne kóshelerdi abattandyrý qolǵa alyndy. Jalpy, bir jyldyń ishinde osy aýdanda 392 joba júzege asyryldy. Sonymen qatar Qordaıda «Tilderdi oqytý ortalyǵy», ımamdar úıi ashyldy. Bes aýyldyq okrýgte qoǵamdyq keńester jasaqtalyp, olar ishki turaqtylyqty nyǵaıtý jónindegi jumysyna kiristi.
Áýlıeatalyqtardy ǵana emes, álem jurtyn ábigerge salǵan pandemııamen kúres kezinde de Berdibek Máshbekulynyń qaıratkerlik qyry aıqyndala tústi. Qarapaıym medısınalyq maskanyń ózi qat dúnıege aınalǵan tusta Memleket basshysynyń bastamasymen Otarda otandyq vaksına shyǵaratyn TMD-da teńdesi joq bıofarm zaýyty qurylysynyń qolǵa alynýyna muryndyq boldy. Medısına salasyndaǵy maman tapshylyǵy máselesin túbegeıli sheshý úshin Sanjar Asfendııarov atyndaǵy Qazaq ulttyq medısına ýnıversıtetiniń Taraz qalasyndaǵy fılıalynyń ashylýyn uıymdastyrdy.
Qordaıdaǵy ahýal turaqtalyp, jer-jahandy jaýlaǵan aýrýmen arpalys júrip jatqan tusta oryn alǵan Baızaq aýdanyndaǵy áskerı qoımada bolǵan jarylys ta oblys ákimi úshin syn sátterdiń biri edi. Joıqyn jarylys saldarynan qıraǵan dúnıeni, oryn alǵan shyǵyndy aıtpaǵanda, qyzmet babynda sheıit bolǵandardyń jaǵdaıy qabyrǵaǵa qatty batty. Bul joly da Berdibek Máshbekuly zardap shekken halyqtyń qasynan, istiń basynan tabyldy. Az ǵana ýaqytta jarylystan japa shekkenderdiń otbasylaryna janashyrlyqpen járdem berip, zardap shekken nysandardy qaıta qalpyna keltirdi. «Ornynda bar ońalar» dep dana halqymyz aıtqandaı, turǵyndardyń qalypty tirshiligine qaıta oralýyn jan-jaqty qamtamasyz etti.
Saýapty is sanatyndaǵy «Týǵan jerge týyńdy tik», «Asarlatyp úı salý» jáne «Jomart túlek» sekildi jobalar bastaldy. Asarlatyp úı salý salty qaıta jańǵyrtylyp, baspana baqytyna qol jetkize almaı júrgen 350-ge jýyq otbasy osy joba aıasynda úıli boldy. Al Taraz qalasynyń qaq tórinen boı kótergen «Anaǵa taǵzym» ortalyǵy men onyń aldyndaǵy qazaq áıeline ornatylǵan eskertkish – dana halqymyzdyń barsha analary men arýlaryna kórsetken syı-qurmeti. Oblys ákimi ózi bastap aparyp, balalar úıinen óńirde basshy laýazymdarda júrgen áriptesteri men kásipkerlerge bir-bir baladan qamqorlyǵyna bekitip berdi.
Bastaǵan isin aıaqsyz qaldyrmaıtyn qaıratker qashanda halyqpen jany bir, rýhy egiz ekenin nátıjeli isterimen dáleldedi. Ákim bolǵan eki jyl ishinde 460 márte eldi mekenderge shyǵyp, myńǵa jýyq nysandy aralady. 163 ret halyqpen kezdesip, 800-den asa máseleniń oń sheshilýine yqpal etken.
Máselen, Talas aýdanynyń burynǵy ortalyǵy Aqkól aýylynyń áleýeti úshin alańdap júrgen aqsaqaldardyń bir ótinishi – bos turǵan burynǵy kolledjdiń ǵımaratyn qaıta paıdalaný bolatyn. Kezekti bir kezdesýde osy másele kóterilgennen keıin arnaýly áleýmettik qyzmet usyný ortalyǵy qurylyp, 2021 jyly 194 mln teńgege nysanǵa kúrdeli jóndeý jumysy júrgizildi. 2022 jyldyń basynan 200 qyzmet alýshy qabyldandy. 171 jańa jumys orny ashylyp, onyń basym bóligine Aqkól aýylynyń turǵyndary qabyldandy. Burynǵy qarashańyraq bolǵan soń oblys ákimi Aqkóldiń tynys-tirshiligine kóp alańdaıtyn. Kól sýynyń deńgeıin ózi kelip kórip ketetin. Kólge kelgen saıyn «Myna kóldiń aınalasy týra meniń aýylym sekildi. Topyraǵy da, aýasy da, sýy da uqsaıdy. Osy kúni aýyldy kóp eske alam, aǵaıyndardy saǵynamyn», deýshi edi.
Aǵamyzdyń jaýapkershiligi men iskerligin qansha jazsaq ta taýysý múmkin emes. О́zekjardy lebiziniń birinde «Men Syr boıynan sabaq alyp, Ońtústikten oı túıip, Altaıdan ór minezdi kórip, Jaıyqtan jaıdarylyqty alǵan edim, endi mine, kıeli Áýlıeata topyraǵynyń batasyn alyp júrmin», dep shyn peıil, shynaıy kóńilin jasyrmaı aıtatyn. Bekzat bolmysty, antyna adal, amanatyna berik Berdibek Máshbekuly sol degenine jetti. Áýlıeatadan attanar aldynda da tektiliktiń keń besigine aınalǵan kıeli aımaqtyń aqpeıil jurtynyń aq batasyn alyp, qımastyqpen qoshtasqan edi.
Búginde saǵynyshqa aınalǵan sanaly ǵumyryn ult pen urpaq jolynda sarp etken Berdibek Saparbaev qoǵamnyń ár salasynda qoltańbasy qalǵan, adamgershilik pen parasattyń tizginin teń ustaǵan tulǵa retinde júrek tórinde qaldy. El basqarý isiniń ozyq oıly aqtańgeri atanǵan, syndarly saıasattyń sańlaǵy, kisilik kelbeti, úlkenge qurmeti, kishige izeti aıryqsha Berdibek Máshbekulynyń jarqyn beınesi jadymyzda. Ol kisi kemel adam edi. Bir artyqshylyǵy – árdaıym áriptesterdiń kóńil-kúıin baǵamdap, júris-turysynan, sóılegen sózinen-aq qanshalyqty qabiletti qyzmetshi ekenin bilip otyratyn.
«Eger bekter qaı jolmen júrse, onda ol bektiń joly – qyzmetkeriniń de, halqynyń da joly», deıdi Júsip Balasaǵunı. Baıtaq dalanyń bes óńirin abyroımen basqaryp, halyqtyń baq-berekesin arttyrýǵa ólsheýsiz úles qosqan Berdibek Máshbekulynyń jolyn keıingi jastarǵa bersin.
Qanatbek MÁDIBEK,
Jambyl oblysy ákiminiń orynbasary
