Elordada Musylman aqsaqaldar keńesi – Ortalyq Azııa keńsesiniń uıymdastyrýymen, Parlament Senatynyń qoldaýymen «Qusnıhat: Ortalyq Azııadaǵy ıslam kallıgrafııasy» atty kórme ashylyp, alqaly jıyn bolyp ótti. Kórmege grafıkalyq jazý óneri sheberleriniń 30-ǵa jýyq týyndysy qoıylǵan. Onyń ishinde kýfı Quran nusqasy men Muhammed paıǵambardyń Vızantııa ımperatory men Bahreın koroline jazǵan hattarynyń kóshirmeleri, Ortalyq Azııadaǵy kóne kýfı jazýlardyń úlgileri, ımam Buharıdiń sııasaýyty, «Omar ıbn Hattabtyń qany tamǵan» Quran kitabynyń kóshirmesi bar. Sonymen qatar Qazaqstan, Túrkııa, О́zbekstan, Qyrǵyzstan elderinen kelgen qylqalam sheberleriniń qusnıhat jazýlary kórermenge keńinen tanystyryldy. Is-sharaǵa ıslamtanýshy mamandar men ǵalymdar, Senat jáne Májilis depýtattary, zııaly qaýym ókilderi qatysyp, jan-jaqty oılaryn ortaǵa saldy.
Jıynda sóz alǵan Senat depýtaty, akademık Darhan Qydyráli qusnıhat óneri týraly aıtyp ótti.
– Ortalyq Azııada renessans dáýirin bastan ótkergen ıslam órkenıetiniń ózeginde kórkem nıet bar. Al kórkem nıet kórkem sóz ben kórkem jazý arqyly jurtqa jetedi. Quranmen birge bastalǵan kórkem jazý osy qusnıhat ónerin Qarahan, Shaǵataı, Altyn Orda dáýirinde bıik talǵam men tereń tanym arqyly damyta tústi. Sondyqtan qusnıhat bizdiń ortaq rýhanı muramyz ǵana emes, tasqa qashalǵan, hatqa túsken tarıhı jádigerimiz, ulttyq jadymyz, estetıkalyq hám etıkalyq qundylyǵymyz, – dedi Darhan Qýandyquly.
Sonymen birge Q.A.Iаsaýı murasyn uzaq jyldardan beri zerttegen belgili ǵalym, túrkııalyq professor Metın Akar Túrkistandaǵy Áziret Sultan kesenesiniń syrtqy jazýlarynyń jumbaq syry týraly baıan etti. Jurt oıý dep uǵatyn órnekterdiń kórkem jazý ekenin anyqtaǵan ǵalym, olardy oqyp, arnaıy kitap jazǵan. Professor Metın myrza kesenedegi keıbir jazýlardyń restavrasııa barysynda búlingenin, óship qalǵan jazýlardy qalpyna keltirgenin naqty dálelder arqyly baıandap berdi. Sonymen birge ózbekstandyq belgili qusnıhat sheberi Habıbolla Salıev Tashkentte saqtalyp turǵan Osman halıftiń Quran nusqasy, kýfalyq mushaf jáne Ortalyq Azııadaǵy kóne jazýlardyń erekshelikteri týraly jan-jaqty aıtyp ótti.
– Búgin sizdermen birge taǵylymy mol kórmeni qarap shyqtyq. Bul kórmeden biz úsh túrli qundylyq alamyz. Birinshiden, rýhanı qundylyq. Kórme rýhanı qazynaǵa óte baı, tylsym tereńine tartady, qansha zamannan beri qundylyǵyn joǵaltpaǵan dúnıeler. Ekinshiden, ǵylymı qundylyq alyp otyrmyz, munyń bári ejelden kele jatqan ǵylymmen tikeleı baılanysty. Úshinshiden, estetıkalyq qundylyqtar. Jazýǵa qarasańyz kóz toıady, bir qarasańyz órnek sııaqty, bir qarasańyz túbirli jazýǵa uqsaıdy. Osynyń bári túptep kelgende bizdiń mádenıetimizdi baıytady. Biz bul bastamany qoldap, qýattaýymyz kerek, – dedi Prezıdent keńesshisi, akademık Baýyrjan Omaruly.
Aıta keteıik, shara barysynda Ulttyq arhıv ǵımaratynda, arnaıy shaqyrylǵan mamandar men sheberlerdiń qatysýymen baıyrǵy jáne zamanaýı qusnıhat úlgileri týraly sheberlik saǵattar ótkizý josparlanǵan.
