Bostonda baǵy jandy

700 myńǵa jýyq turǵyny bar Bostonda ótken dúbirli dodaǵa jer-jahannyń barlyq myqty mánerlep syrǵanaýshylary jınaldy. Jarys jolyna shyq­qandar arasynda ekiniń biri – Olımpıada men álem chempıonattarynda atoı salǵan sań­laqtar. Halyqaralyq, qur­lyq­tyq jarystarda jeńis tu­ǵyryna kóterilgenderdiń qarasy tipten kóp. Olar bes kún boıy áıgili TD-garden arenasyna jınalǵan san myń kórermen men kógildir ekranǵa kóz tikken mıllıondaǵan jankúıerdi aı­shyq­ty ónerlerimen qýantty.

Jarysta Ilıa Malınınniń mereıi ústem boldy. 20 jastaǵy AQSh-tyń ataqty sportshysy 2023 jyly Saıtamada uıymdastyrylǵan dúnıejúzilik dodada qola medal alsa, 2024 jyly Monrealda aldyna jan salmady. Sol kórsetkishin bıyl da qaıtalady. О́z otanynda ótken baıraqty báseke barysynda 318,56 upaı jıǵan Ilıa bas júldeni oljalady. Qysqa baǵdarlamada úzdik úshtikti túıindegen Mıhaıl Shaıdorov erkin jattyǵýda da «shabysynan» jańylǵan joq. О́z kompozısııasyn ádemi oryndap shyqqan jerlesimiz 287,47 upaı jınap, kúmis medaldi enshiledi. Olımpııa men Azııa oıyndarynda bir márte, álem chempıonattarynda úsh ret kúmispen kúptelgen japonııalyq Iýma Kagııama qola júldeni qorjynǵa saldy. Onyń jıǵan upaıy – 278,19.

Osy kúnge deıin elimizdiń mánerlep syrǵanaýshylary álem chempıonattarynda úsh ret jeńis tuǵyryna kóterilgen edi. Alǵashqy eki júldeni Denıs Ten ıelendi. 2013 jyly Londonda kúmis alsa, 2015 jyly Shanhaıda qolaǵa qol sozdy. 2019 jyly Saıtamada Elızabet Tursynbaeva asqan sheberligimen tánti etti. Qytaı elinde qazaq qyzy kúmispen kúpteldi. Mine, endi 20 jastaǵy Mıhaıl Shaıdorov elimiz sportynyń mereıin ósirip, abyroıyn asqaqtatty.

Jarys aıaqtalǵan bette BAQ ókilderine suhbat bergen sý jańa álemniń vıse-chempıony: «Muz aıdynyna shyqqanda medal týraly esh oılaǵan joqpyn. Tek qana dúıim jurttyń aldynda ózimniń shynaıy múmkindigimdi kórsetip, syrǵanaýdan lázzat alǵym keldi. Osy erkindik, óz-ózime degen senimdilik meni jeńis tuǵyryna jeteledi», dep aqtaryla sóıledi.

Áıelder arasynda baq synaǵan Sofıa Samodelkına (117,78 upaı) jarys­ty 14-orynmen qorytyndylady. Ol jeńis tu­ǵy­ryna mańaılaı almasa da, osy nátı­je­si­niń arqasynda Olımpııa oıyndaryna qa­ty­sý­shylardyń tizimine qosyldy. 18 jastaǵy sportshyǵa osynyń ózi az tabys emes.

Úzdik shyqqan syrǵanaýshylar ja­ıynda aıtar bolsaq, AQSh arýy Alısa Lıý (222,97) aldyna jan salmady. Ol osydan úsh jyl buryn Monpeledegi álem chem­pıo­natynda qola medaldi ıelen­gennen keıin úlken sportpen qosh aıtysqan edi. Sodan muz aıdynyna qaıta oralyp, kúni keshe ǵana tórtkúl dúnıeniń teńdessizi dep tanyldy. Kúmis, qola medaldardy Japonııanyń qos juldyzy – Beıjiń Olımpıdasynyń qola, komandalyq saıystaǵy kúmis júldegeri, álemniń úsh dúrkin chempıony, Azııa oıyndarynyń jeńimpazy, japonııalyq Kaorı Sakamoto (217,98) men «Tórt qurlyq týrnırinde» top jarǵan Mone Tıba (215,24) enshiledi.

Juptyq saıysta Rıký Mııý­ra/Rıýıtı Kıhara (Ja­ponııa) jeńimpaz atansa, Mıne­reva Faben Haze/Nıkıta Volodın (Germanııa) men Sara Kontı/Nık­kolo Machchı (Italııa) júl­degerler qataryna qosyldy. Sporttyq bıshilerdiń básekesinde Medıson Chok/Evans Beıts (AQSh) teń­dessiz dep tanyldy. Paıper Gılles/Pol Pýare (Kanada) kú­mispen kúptelse, Laıla Fır/Lıýıs Gıpson (Ulybrıtanııa) qolaǵa qol jetkizdi.