Sýretti túsirgen – Erlan OMAR, «EQ»
Bıylǵy jyldyń birinshi toqsanynda oblysta aksııa aıasynda shamamen 90-ǵa jýyq is-shara ótkizildi. Sonyń bári derlik, jastardyń bastamasymen, túrli formatta uıymdastyryldy. Atap aıtqanda, 38 tazalyq marafony, 5 ekofestıval, 8 konkýrs, 8 chellendj, 5 jabyq oryndarda kógaldandyrý aksııasy, 15 trenıng, 9 vandalızmniń aldyn alý is-sharasy boldy.
Petropavl qalasynyń mektepterinde belsendiler men volonterler oqýshylar arasynda qorshaǵan ortany taza ustaý jóninde qyzyqty aksııalar ótkizdi. «Qorshaǵan orta – ol da seniń úıiń sııaqty, úıińniń ishin qalaı taza ustasań, esik aldyn, aýlany, kósheni de solaı taza ustaý kerek. О́ıtkeni bul seniń ómir súrý, ósý aýmaǵyń, qýanyshpen kúletin, jadyrap-jaınap júretin ortań» degen uǵymdardy balalardyń qalaı túsingeni týraly konkýrstar uıymdastyryldy, oqýshylardyń ekologııany taza saqtaý, qorshaǵan ortany qorǵaý baǵytyndaǵy shyǵarmashylyqtary saralandy. Oǵan talapkerler salǵan sýretterimen, jazǵan óleńderimen, kórkem shyǵarmalarymen qatysty. Úzdik shyqqan oqýshylarǵa syılyqtar men Alǵyshattar tabys etildi.
«Osy is-sharanyń bári jas jetkinshekterdiń boıynda ekologııalyq tazalyqty saqtaý uǵymyn qalyptastyrý, damytý maqsatynda ótkizildi. Saıyp kelgende, bul jumystar jastardyń patrıottyq sezimin oıatyp, óz eline, óz jerine degen mahabbatynyń jandanýyna áser etedi. Oqýshylardyń iske degen yntalylyǵy bizdiń de qulshynysymyzdy arttyrdy», deıdi Petropavl qalalyq jastar resýrstyq ortalyǵynyń jetekshisi Damır Ábdın.
«Naýryznama – 2025» onkúndigi aıasynda aýlalardy tazartý, jalǵyzilikti qart adamdarǵa kómektesý jóninde qyryqqa jýyq is-shara uıymdastyryldy. Byltyr jyl boıy osyndaı qamqorlyq is-sharasy, ekologııalyq aksııalarǵa jastar arasynan 5 myńdaı volonter qatysty. Tazalyq saqtaý aksııalaryna 10 myńnan artyq adam tartyldy. Bıyl da 300-den astam ekologııalyq aksııa men is-shara josparlanyp otyr. Sonyń ishinde turaqty júrgiziletinder qatarynda «Taza aýla – taza Otan», «Tabıǵatty aıala!», taǵy basqa da bataly bastamalar bar. Jastar resýrstyq ortalyǵy jalǵyzilikti qarttardyń aýlalaryn tazartý, otynyn daıyndap berý, kúl-qoqysyn syrtqa shyǵarý jónindegi «Qamqor», «Kómek kelip qaldy», «Qaıyrymdylyq» aksııalaryn turaqty júrgizedi.
Aksııalar men is-sharalardy ilgeriletý maqsatynda áleýmettik jelilerde ekotrendter jasalyp, oǵan aımaqtyq blogerler, qoǵamdyq pikirdiń kóshbasshylary, depýtattar, ardagerler, volonterler, tanymal sportshylar tartylady.
Soltústik Qazaqstan oblysy
