Qazaq mýzyka óneriniń qorjynyn qaıtalanbas týyndylarymen baıytqan uly tulǵanyń 1-sáýir týǵan kúnine arnalǵan is-shara Jambyl Jabaevtyń ádebı-memorıaldy mýzeıiniń aldyndaǵy jyr alyby Jambyldyń jáne qazaq dalasyn kúımen terbegen Halyq qaharmany Nurǵısa Tilendıevtiń eńseli eskertkishterine alqyzyl gúl shoqtaryn qoıyp, rýhtaryna Quran baǵyshtap, taǵzym etýden bastaldy.
Mereıtoılyq is-shara Uzynaǵash aýylyndaǵy aýdandyq mádenıet úıinde jalǵasty. Saltanatty jıynǵa oblys basshylyǵy, zııaly qaýym ókilderi, mádenıet jáne óner qaıratkerleri, sondaı-aq jergilikti turǵyndar qatysty. Abyz aqyn Jambyl men kúıshi, kompozıtor Nurǵısanyń monologymen bastalǵan sahnalyq qoıylym oqýshylardyń horymen kórkemdelip, sharanyń mán-mazmunyn arttyrdy.
«Barshańyzdy qazaq óneriniń jaryq juldyzy, kúıshi, dırıjer, Qazaqstannyń halyq ártisi Nurǵısa Tilendıevtiń 100 jyldyq mereıtoıymen shyn júrekten quttyqtaımyn! Memleket basshysy Qasym-Jomart Toqaev: «El tarıhynda erekshe orny bar tulǵalarǵa qurmet kórsetý – ulttyq biregeıligimizdi nyǵaıta túsedi», dep atap ótken bolatyn. Bul mereıtoı – uly kompozıtordyń shyǵarmashylyǵyn ulyqtap, keıingi urpaqqa nasıhattaýdyń jarqyn kórinisi. IýNESKO deńgeıinde atalyp ótetin bul aıtýly dataǵa oraı, oblysymyzda arnaıy jospar qabyldanyp, halyqaralyq jáne respýblıkalyq deńgeıdegi mádenı is-sharalar uıymdastyrylady. Onyń ishinde «TÚRKSOI» uıymymen birlesken jobalar, aýqymdy konsertter, sondaı-aq Ile aýdanynda eńseli eskertkish ornatý, mádenıet oshaqtaryna, kósheler men bilim berý mekemelerine Nurǵısa Tilendıevtiń esimin berý josparlanǵan. Halqymyzdyń júregine án bolyp engen, rýhyn asqaqtatqan dara perzentiniń murasy máńgi jasaı bermek. Uly tulǵanyń esimi men eńbegi keler urpaqqa úlgi bolyp, qazaq óneri órkendeı bersin!», dep izgi tilegin arnaǵan Almaty oblysynyń ákimi Marat Sultanǵazıev mereıtoıdyń qazaq mádenıeti úshin mańyzy zor ekendigin aıryqsha atady.
Kúı qalyqtaǵan mádenı-sazdy jıynda qoǵam qaıratkeri, jazýshy, Qazaqstan Jazýshylar odaǵynyń múshesi Naǵashybek Qapalbekuly sóz alyp, Nurǵısa Tilendıevtiń ómir joly men ulttyq mádenıetke qosqan ólsheýsiz eńbegi jóninde jan-jaqty baıandady.
«Nurǵısa – qazaqtyń birtýar perzenti. Ákesi balasynyń keýdesine «nur quısyn» dep atyn «Nurquısa» qoıypty. Uly ózenderdiń basy móldir bulaqtardan bastalady. Nuraǵa da batyrlar men aqyndar elinde týyp, tıtteıinen jyrdyń piri Súıinbaı bastaǵan qara ormandaı aqyn, ánshi, jyraýlardyń án-jyryn, ertedegi qısa-dastandardy estip ósti. Kúlli qazaqtyń abyz aqyny – Jambyl atanyń tizesinde erkeleı otyryp, qart jyraýdyń dombyra qaǵysyn, jyr áýenin úırendi. Ulyny – uly tanıdy, suńqardy suńqar parlap ushqan qanat qaǵysynan, tulpardy tulpar jer tarpyǵan shalqar shabysynan tanıdy. Bes jasynda Qaraqystaqtan Almatyǵa kóship kelgen áke-sheshesi jumysqa shyǵyp ketedi de, úıde bala Nurǵısa jalǵyzdan jalǵyz qalady. Osy kúngi 2-shoıynjol vokzaly turǵan orynda bákene toqal tamnyń ústine shyǵyp alyp, ózi úırengen kúılerin erteden keshke deıin tarta beredi, tarta beredi. Ary-beri ótkinshiler arasynda portfel ustaǵan bir kisi ylǵı tyńdap turady. Sol kisi bir kúni ádeıi burylyp kep, «júr balam, men seni oqytaıyn» dep Chaıkovskıı atyndaǵy mektepke alyp keledi. О́jet minezdi 6 jasar bala kıiz qaptan domybarasyn alyp, ákesiniń «Aqqý» atty kúıin naqyshyna keltirip tartyp beredi. Sóıtip, oqýǵa qabyldanady. Muny ertip ákelgen ataqty akademık Ahmet Jubanov edi», dep eske saldy qoǵam qaıratkeri, jazýshy Naǵashybek Qapalbekuly.
Odan ári shyǵarmashylyǵyn tarqatty. «Otyrar sazy» orkestrine 1999 jyly Tilendıev esimi berilse, 2000 jyly akademııalyq ataq berilgenin, Nurǵısa Tilendıev «Altyn taýlar» operasyn, «Dostyq jolymen» baletin, «Orteke» balet-poemasyn, «Meniń Qazaqstanym» kantatasyn, orkestrge arnalǵan «Poema», «Ata tolǵaýy», «Aqsaq qulan», «Aqqý», «Arman», «Mahambet», Kósh-kerýen» poemalary men «Halyq qýanyshy», «Qaırat», «Jeńis saltanaty» atty kirispelerdiń, 400-den astam án men romanstyń avtory ekenin tilge tıek etti.
Ǵasyrlyq mereıtoıy IýNESKO kóleminde atalatyn dara tulǵanyń esimi men eńbegi eliniń máńgi júreginde án bop shyrqalyp, kúı bop terbele bermek.
Saltanatty shara sońynda «Súıinbaı sazy» halyqtyq-follorlyq etnografııalyq ansambliniń ónerpazdary uly kompozıtordyń shyǵarmashylyǵynan konserttik baǵdarlama usynyp, kóptiń qoshemetine bólendi.
