Foto: Ashyq derekkóz
Tramp Truth Social áleýmettik jelisindegi paraqshasynda 185 eldiń tizimin jarııalady, olardyń ımporttyq ónimderine AQSh ákimshiligi ózara negizde kedendik baj salyǵyn engizedi.
Bazalyq tarıf 10% mólsherinde belgilengenimen, kóptegen elder úshin bul kórsetkish joǵary bolyp shyqty:
- Qytaı – 34%
- Eýropalyq Odaq elderi – 20%
- Shveısarııa – 31%
- Ulybrıtanııa – 10%
- Izraıl – 17%
- Qazaqstan – 27%
- Vetnam – 46%
- Kambodja – 49%
- Laos – 48%
Reseı bul tizimge enbegen. Sonymen qatar, Meksıka, Iran, Kanada jáne Belarýs elderine de baj salyǵy engizilmegen. Al Ýkraınadan keletin taýarlarǵa 10% saýda salyǵy salynatyny habarlandy.
Postkeńestik elderdiń kópshiligine 10%-dyq tarıf engizilgen. Alaıda Qazaqstan (27%) men Moldova (31%) úshin bul kórsetkish aıtarlyqtaı joǵary. Armenııa, Ázerbaıjan, Grýzııa, О́zbekstan, Túrkimenstan, Qyrǵyzstan jáne Tájikstan úshin baj salyǵy 10% deńgeıinde saqtaldy.
Tramp jeńil jáne júk kólikterine, sondaı-aq avtokólik bólshekterine 25%-dyq baj salyǵyn engizý týraly buıryqqa qol qoıdy.
AQSh prezıdenti bul sharalardy «ekonomıkalyq táýelsizdik deklarasııasy» dep atap, 2 sáýirdi «Amerıka azattyq kúni» dep atady.
«Ondaǵan jyldar boıy AQSh-tyń dostary men qarsylastary bizdiń ekonomıkamyzdy paıdalandy. Biraq baj salyǵyn engizýmen bul aıaqtaldy. Bul – AQSh úshin jańa altyn ǵasyrdyń bastaýy», dedi Tramp.
Sonymen qatar, ol baj salyǵynyń mólsheri ózgertilýi múmkin ekenin eskertti. 10%-dyq bazalyq baj salyǵy – 5 sáýirden bastap, birqatar elder úshin joǵary tarıfter – 9 sáýirden bastap kúshine enedi.
Sarapshylardyń pikirinshe, bul jańa tarıfter AQSh-taǵy ınflıasııanyń ósýine jáne tutyný baǵasynyń qymbattaýyna ákelýi múmkin. Sondaı-aq, kóptegen elder AQSh-tyń bul áreketine jaýap retinde óz tarıfterin engizýi múmkin, bul jahandyq saýda soǵysyna alyp kelýi yqtımal.
