Bul – «Disney»-diń qazaq tilinde «sóıletken» tórtinshi fılmi. Fılmderdi túrli elderge beıimdep, dýblıajdaý – «Disney» kompanııasynda burynnan qalyptasqan úrdis. «Disney» jyl saıyn ár fılmniń túrli tilderdegi 40-qa jýyq nusqasyn daıyndaıdy. «Qazaq tili» qoǵamynyń uıytqy bolýymen byltyrdan bastap iri halyqaralyq stýdııalar álemdik premeralaryn ultymyzdyń tilinde usyna bastady. Osy bastama aıasynda «Disney» stýdııasy 2024 jyly «Oıjumbaq 2», «Moana 2», «Mýfasa. Arystan patsha» dep atalatyn úsh fılmin qazaq tiline aýdaryp, dýblıaj jumysyn qarjylandyrdy. Endi kórermenge «Aqshaqar» týyndysy usynylyp otyr. «Disney» stýdııasynyń «Aqshaqar» fılmi – 1937 jylǵy anımasııalyq fılmniń beıimdelýi. Sıqyr men mýzykaǵa qurylǵan shytyrman oqıǵada 7 ergejeıli keıipker – Aqyldy, Jubanshaq, Kúlegesh, Uıalshaq, Túshkirshek, Uıqyshyl, Ańqaý ekranǵa qaıta oralady.
Kórsetilimge dýblıaj akterleriniń tolyq quramy, tanymal tulǵalar tutas qatysty. Olar: mıýzıkl aktrısasy Jarqynaı Hanaıym, ánshi, aktrısa Aıgúl Imanbaeva, ánshi Juldyz Ýálıhan, ánshi Erkesh Hasan, akter Qaırat Ádilgereı, kınorejısser Aqan Sataev. Qazaq tilindegi dýblıaj rejısseri – Shah-Murat Ordabaev, qazaq tilindegi ánderdiń mýzykalyq jetekshisi – Anel Sirgebaeva.
Buǵan deıin «Moana 2»-niń qazaqsha nusqasy boks-ofısterdiń 12,36% úlesin qamtyǵan edi. Kassalyq tabys úlesi 12 kúnde 151 000 000 teńgeden asyp, qazaqshaǵa aýdarylǵan anımasııalyq fılmder arasynda eń tabysty týyndy retinde rekord ornatty. «Disney» men «Pixar» stýdııasynyń «Oıjumbaq 2» fılmi alǵashqy 4 kúnde 40 000 000 teńgeden astam qarajat jınap, buǵan deıin kórsetilgen týyndylar arasynda rekord ornatqan bolatyn. «Mýfasa. Arystan patsha» kórkem fılmin qazaq jáne orys tilderinde kórýge 1,1 mıllıon kórermen kelgen.
Kórsetilimge elimizge tanymal tulǵalar, qoǵam qaıratkerleri, kásipkerler men depýtattar, dýblıaj akterleri men blogerler, BAQ ókilderi qatysty.
ALMATY
