Atalǵan baǵdarlama 10-11-synyp oqýshylaryna mekteppen qatar kolledjde kásiptik bilim alýǵa múmkindik beredi. Osylaısha, joǵary synyp oqýshylary teorııalyq bilimmen qatar, tájirıbe jınaqtap, eńbek naryǵyna daıyn maman retinde shyǵady.
Eksperımenttik bilim baǵdarlamasy elordadaǵy Kásiptik-tehnıkalyq kolledj, Servıs jáne týrızm kolledji men Tehnıkalyq kolledjde júzege asty.
Kásiptik-tehnıkalyq kolledj dırektorynyń kásiptik oqytý boıynsha orynbasary Názıra Toǵaıbaeva atalǵan baǵdarlamanyń ereksheligine toqtaldy.
«Bul jobanyń ereksheligi mektep oqýshylary 10-11-synypta oqyp júrip-aq kolledjderge baryp, qalaǵan mamandyqtary boıynsha kásibı bilim ala alady. Kásibı bilim alý maqsatynda olar teorııalyq jáne tájirıbelik bilim aldy. Osylaısha, oqýshylar mektep attestatyn almaı jatyp, biliktilik týraly dıplom alyp otyr. Mektep oqýshylary 11-synyptan keıin joǵary oqý ornyna oqýǵa túspeı qalǵan jaǵdaılar bolady. Sol kezde olar kez kelgen jumys ornyna tolyqqandy maman retinde jumysqa kire alady. Osylaısha, elimizde jumyssyz júrgen jastardyń sany azaıady», dedi N.Toǵaıbaeva.
Aıta keteıik, dıplom alyp otyrǵan mektep oqýshylary «Avtomobıl kóligine tehnıkalyq qyzmet kórsetý, jóndeý jáne paıdalaný», «Tamaqtandyrýdy uıymdastyrý», «Tigin óndirisi jáne kıimderdi úlgileý», sondaı-aq «Dánekerleý isi» mamandyqtary boıynsha bilim alǵan.
