Al, shapshań damyp jatqan bul ǵylymı progreste qazaqtyń ǵylymy, men tili qaı deńgeıde, qanshalyqty qoldanysta?! «Túpki maqsatymyz – kóshke ilesetin emes, sol kóshti bastaıtyn elderdiń qatarynda bolý. Bul maqsat, árıne, óte kúrdeli, ony jaqsy túsinýimiz kerek. Men bul týraly únemi aıtyp júrmin. Iаǵnı, ǵylymı damýdyń sońynda qalmaı, osy progresti anyqtaıtyn memleketterdiń qatarynda bolý – negizgi mindet. Bálkim, bul mindet tym kúrdeli kóriner. Biraq biz aldymyzǵa osyndaı maqsat qoıýymyz kerek. Oǵan elimizdiń ǵylymı áleýeti jetedi. Bul mindettiń ońaı emes ekenin túsinemin. Alaıda biz ony sózsiz oryndaýǵa tyrysýymyz qajet. Jalpy, biz aldymyzǵa qol jetkize almaıtyn tym asqaq maqsattar qoımaýymyz kerek. Biraq ǵylymı jetistikterge jetý úshin bar kúsh-jigerimizdi salýymyz qajet», (https://halyq-uni.kz/) – degen bolatyn Qasym-Jomart Kemeluly Ǵylym jáne tehnologııalar jónindegi ulttyq keńestiń birinshi otyrysynda.
El Prezıdenti endigi jerde baılyq pen jaqsy ómirdiń kilti ǵylymda ekenin meńzep otyr. Osy sebepti otandyq ǵylymdy damytý maqsatynda tyń bastamalardy qolǵa aldy. Bul óz kezeginde ǵylymǵa jańa serpin berdi.
Túrkistan qalasynda «Qazaq tili – ǵylym tili: jasandy ıntellekt jáne termınologııa» taqyrybynda Halyqaralyq II sımpozıým ótip jatyr. Ǵylymı jıynǵa túrki dúnıesinen 500-ge jýyq ǵalymdar qatysyp, ǵylymdaǵy, jasandy ıntellektidegi qazaq tiliniń termınologııalyq máselelerin talqylady. Sımpozıým – qazaq tiliniń ǵylymdaǵy qoldanysyn keńeıtýge, halyqaralyq deńgeıde tanylýyna, sondaı-aq, jasandy ıntellekt tehnologııalaryn tiltaný salasyna engizýge baǵyttaldy. Bul – til mamandary, IT mamandar, ǵalymdar, termınologtar, bilim berý salasynyń ókilderi úshin úlken pikirtalas alańyna aınaldy.
Sımpozıýmda 5 seksııa jumystary jáne birneshe workshop-tar ótkizildi. Sheberlik saǵattarynda jasandy ıntellektini bilim men ǵylymda tıimdi kómekshi qural retinde paıdalaný tájirıbesi aıtyldy. Bul óz kezeginde búgingi óskeleń urpaq pen aǵa ǵalymdardyń zamanaýı tehnologııany ıgerýlerine paıdaly boldy.
Sondaı-aq halyqaralyq derekter qoryna enetin resenzııalanǵan jýrnaldardyń redaktorlary jınalyp ózara pikiralmasyp, tájirıbelerimen bólisti. Ýnıversıtet rektory J.Temirbekova, rektor ókili, professor N.Gench workshop-qa arnaıy kelgen qonaqtarǵa alǵys bildirip, sáttilik tiledi. Pikir almasý alańynda «Bilig» jýrnalynyń redaktory F.Pýrtash, «Türk Kültürü ve Hacı Bektaş Veli Araştırma» jýrnalynyń redaktory M.Karakýlak, «Türkiyat Mecmuası» redaktory E.Temel Alemdar, «KIPD Bulletin» jýrnalynyń shyǵarýshy redaktory S.Aýbakırova jáne t.b. ǵylymı basylym redaktorlary tájirıbelerimen bólisti. Túrki álemi redaktorlarynyń basyn qosqan jıynda Halyqarlyq ındeksteletin jýrnaldar bazasyna jýrnaldardyń qosylý talaptary sóz boldy. Sonymen qatar jýrnaldardaǵy ǵylymı maqalalardyń sapasyn arttyrýǵa baǵyttalǵan jumystar men JI kómegimen ázirlengen ǵylymı maqalalardyń máseleleri talqyǵa tústi.
Álemdik ǵylymı jýrnaldar halyqaralyq ındeksteletin bazalarǵa enýdi basty maqsat etedi. Bul maqsat qazaqstandyq ǵylymı jýrnaldardyń da aldyna qoıylyp otyr. Taıaýda elimizdiń birneshe ǵylymı jýrnaldary halyqaralyq derekter qoryna kiretin basylymdar qataryna qosyldy. Halyqaralyq ǵylymı jıynda qazaq tiliniń ǵylymı maqala jarııalaýdaǵy úlesi edáýir artyp otyrǵanyn QR ǴJBM Ǵylym jáne joǵary bilim salasyndaǵy sapany qamtamasyz etý komıtetiniń syrtqy baǵalaý jáne taldaý basqarmasynyń basshysy Q.Sákenova málimdedi.
Qazaq tiliniń ǵylym tiline aınalýy úshin alǵysharttar jasalýda. Ahmet Iаsaýı ýnıversıteti dástúrli Halyqaralyq sımpozıým ótkizýdi qolǵa aldy. Alqaly ǵylymı jıynda ana tilimizdiń ǵylym tiline aınalýy úshin atqarylatyn jumystar baǵyty aıqyndaldy.
