Qazaqstan merınosy 120 kıloǵa deıin et beredi

Merki aýdanynda merınos qoıdyń jańa tuqymy paıda boldy. Osy aýdandaǵy Merki asyl tuqymdy qoı zaýyty etti ári júni de sapaly túliktiń bul túrin ómirge ákelý úshin jarty ǵasyrdaı ýaqyt ter tógipti. Jaqynda ǵana bul jańalyqty rastaýǵa kelgen memlekettik jáne sheteldik komıssııa qoı tuqymyn saraptamadan ótkizdi. Sonymen, asyl tuqymdy bııazy júndi qoı «Qazaqstan merınosy» degen ataý aldy.  – Ǵalymdardyń arqa­syn­da asyl tuqymdy qoı sharýa­shylyǵyndaǵy mamandarmen birlese otyryp, biz qoıdyń Avstralııanyń merınosyna para-par keletin, júniniń sapasy jaǵynan eshbir qalyspaıtyn, al biraq jergilikti jerge jaq­sy beıimdelgen, ósimtal, salmaǵy úlken qoıdyń jańa tuqymyn dúnıege ákeldik dep aıtýǵa bolady. Asyl tuqymdy «Qazaqstan merınosynyń» bireýi 14-15 kılo sapaly jún beredi. Etti keledi. Salmaǵy 120 kıloǵa barady. Jazda – jaılaýǵa, qysta qumǵa aıdaýǵa da beıim, – deıdi Qazaq qoı sharýashylyǵy ǵylymı-zertteý ınstıtýtynyń dırektory Serik Ospanov. Bul tuqymnyń burynǵy ósirilip júrgen «Ońtústik qazaq merınosynan» ereksheligi – júniniń sapasynda. Qazir sapaly bııazy, jińishke talshyqty júndi qoılarǵa suranys óte joǵary. Júnniń uzyndyǵy, júnniń tyǵyzdyǵy óte joǵary. Merki aýdanyndaǵy Asyl tuqymdy qoı zaýyty – elimizdegi irgeli sharýashylyqtardyń biri. Qazir munda 26 myńnan astam qoı bar. Sharýashylyq ujymy aldaǵy ýaqytta tólderdiń sanyn arttyryp, odan ári jetildirýdi qolǵa alýda. Búginde bul sharýa­shylyqta 300-den astam aýyl turǵyny eńbek etedi. Olardyń ósirip otyrǵan qoı­lary endi elimizdiń ózge aımaq­tarynda da óristemek. Qazirdiń ózinde kóptegen sharýalar asyl tuqymdy qoılardy alýǵa nıet bildirip otyr. Oralhan DÁÝIT, «Egemen Qazaqstan». Jambyl oblysy.