Memleket basshysy bul baǵyttyń mańyzdylyǵyn Ulttyq quryltaıdyń tórtinshi otyrysynda erekshe atap ótken bolatyn.
4 sáýir kúni Soltústik Qazaqstan oblysynda Qazaq kınosynyń kúnderi bastaldy.
Negizgi maqsat — jergilikti talantty rejısserler men olardyń týyndylaryn halyqqa tanystyrý. Bul fılmderde qazaq halqynyń mádenıeti men rýhy, tarıhymyzdyń mańyzdy kezeńderi, kórnekti memleket jáne qoǵam qaıratkerleriniń ómiri men qyzmeti kórinis tabady.
QR Mádenıet jáne aqparat mınıstri Aıda Balaeva qazirgi ýaqytta kıno salasynyń damýyna erekshe kóńil bólip otyr.
«Biz ortalyqtyń qoldaýymen túsirilgen barlyq jobalar árbir kórermenge jetýin qalaımyz. Tek oblys ortalyqtarynda ǵana emes, aýdandar men aýyldarda da kórsetilýi tıis. Bul jumysty turaqty túrde júrgizemiz. Bir rette 10–15 fılm kórsetilse, artynan jańalaryn jiberemiz», – dedi «Ulttyq kınony qoldaý memlekettik ortalyǵy» KEAQ basqarma tóraǵasy Qurmanbek Jumaǵalı.
Kınony nasıhattaý jumystary respýblıkalyq ǵana emes, óńirlik telearnalarmen de birlesip júrgizilýde. Soltústik Qazaqstan oblystyq telearnasy birneshe jyldan beri otandyq fılmderdi kórsetip keledi.
Qazaq kınosy onkúndigi aıasynda «Qyzyljar Creative Center» shyǵarmashylyq ortalyǵynda «Ulttyq kınony qoldaý memlekettik ortalyǵy» men «Carat-Prognoz» JShS («Pervyı Severnyı» telearnasy) arasynda ózara yntymaqtastyq týraly memorandýmǵa qol qoıyldy.
Onkúndiktiń alǵashqy kúni kórermenderge rejısser Serikbol О́tepbergenovtyń «Ýaqyty kelgen patrıottar» fılmi usynyldy. Bul — terrorızmmen kúres pen otbasy qundylyqtary týraly sapaly ekshn janryndaǵy týyndy.
Fılm áskerı qyzmet atqaratyn eki baýyr týraly. Úlkeni – barlaýshy, kishisi – ıstrebıtel ushqyshy. Ákeleri shaıqasta qaza tapqan. Aralarynda túsinispeýshilik bolǵanymen, el taǵdyry tarazyǵa túsken sátte olar birigip, halyqty qutqarýǵa atsalysady.
«Moraldyq ıdeıa – biz qandaı jaǵdaıda bolsaq ta, ultqa, dinge bólinbeı, birlik pen yntymaqta bolýymyz qajet. Fılmdi jasaýǵa bir jyldaı ýaqyt ketti, ásirese kompıýterlik grafıka kóp ýaqyt aldy, biraq sonyń arqasynda fılm kórkem ári áserli shyqty», – dedi rejısser Serikbol О́tepbergenov.
Kıno kúnderiniń ashylý rásimine SQO ákiminiń apparaty jetekshisi Rýslan Alıshev qatysyp, qatysýshylardy oblys ákiminiń atynan quttyqtap, otandyq kınony nasıhattaýdyń mańyzdylyǵyn atap ótti.
«Bul – óskeleń urpaqty tárbıeleý men qoǵamdyq sanany qalyptastyrý úshin asa mańyzdy jumys. Memleket qarjysymen túsirilgen fılmderdi óńirlerde kórsetý – óte oryndy bastama. Bizdiń kınokompanııalar sapaly kontent jasap otyr, ol álemdik naryqta da óz ornyn tabýda. Osyǵan saı jańa Kreatıvti ortalyǵymyz ashylyp, kıno salasyna bar jaǵdaı jasalǵan. Bizde úlken josparlar, tyń ıdeıalar men kásibı mamandar bar», – dedi Rýslan Alıshev.
Kórsetilimge usynylǵan fılmder ártúrli janrdy qamtıdy:
«Jambyl. Jańa dáýir» jáne «Dos-Muqasan» – ataqty tulǵalardyń ómiri jaıly.
«Baýyryna salý» – qazaq halqynyń salt-dástúrin nasıhattaıdy.
Balalar úshin – «Taıqazan» anımasııalyq fılmi kórsetildi.
Jalpy, Kınony qoldaý ortalyǵynyń kómegimen 117 fılm túsirilgen:
- 72 – kórkem fılm,
- 37 – derekti,
- 8 – anımasııalyq.
