Sýretti túsirgen – Qaısar ShERIM
– Ne bolyp qalypty, túge? – dedi qarııa kirjıip.
– Keıde tym artyq ketip qalasyń. Sońyńnan kele jatqan, biraz jasqa kelgen ulyńdy áli bala kóresiń. «Istiń kózin tappaısyń» dep bala-shaǵanyń kózinshe tuqyrtý bizge endi jaraspaıdy. О́z tirligine myǵym jan osyndaı-aq bolsyn. Balamyzdyń ıini jumsaq, ata-ana syılap qalǵan, basqa bolsa sendeı ákemen baıaǵyda-aq júz shaıysyp, óz jolymen keter edi, – dedi kempir.
– Áı, sen jaıyńa otyr, aqyl úıretpeı adamǵa, – dedi qarııa kempirine túsin sýyta qarap, – balama uryssam adam bolsyn, tirligine mákkamdyq tanytsyn deımin. Jekkórgennen uryspaımyn. Ne desem de óz balam, on jerden jasy ulǵaısa da men úshin sábı. Isine uqypty bolsa da, odan saıyn shıryqtyryp, shırata túsý artyq etpeıdi.
– Men saǵan ulyńa ońashada aıt, biraq bala-shaǵanyń aldynda artyq ketpe dep otyrmyn. Sen ózeýrep, jerden alyp, jerge salyp sóılegenińde baıǵus urys estip turǵan baladaı búrisip, búkjıip qalady. Ol da áke. Tórt perzenti bar. Eshkimnen kem emes. Meniki erteń bala-shaǵasy aldynda abyroı-bedeli tómen bolyp qalmaýyn oılaǵandyq, – dedi keıýana.
Qarııa eski qıqar minezine salyp, kempirine qolyn bir siltep ornynan turyp ketti de, esik aldyndaǵy oryndyqqa jaıǵasty. Aınala typ-tynysh. Aýlany qorshaǵan bıik dýaldyń ar jaǵynan uly men úlken nemeresiniń sóıleskenderin estip qaldy. Biri jumystan, biri mektepten kele jatqany buǵan belgili.
– Atasynyń balasy, úı tapsyrmasyn oryndap bolǵan soń qorany tazalap, sıyrǵa sý berip, azdap shóp týrap qoı. Búgin meniń shuǵyl sharýalarym bar, áıtpese ózim-aq ister edim, – dedi qoldaǵy bala.
Nemeresi ákesine til qatty. Daýysy zildi.
– Qora-poradaǵy tirlikke qolym tımeıdi. Istemeımin, – dedi ata-ájege arqa súıep qalǵan úlken nemere.
– Aıtqan tildi al, bala, qıyn sharýa emes qoı, – dedi uly jumsaq daýyspen.
– Únemi óz ákesin tyńdamaıtyn, tek renjitetin adamnyń tilin almaımyn, – dedi nemere qatqyl únmen.
Nemereniń myna sózin estigen qarııanyń júni jyǵylyp qaldy. Ol oılady: «Kempirdiki jón eken. Endi eski «taktıkany» tastap, jańasyna kóshý kerek». Ol qandaı «taktıka», ony qarııanyń ózi biledi.
