«Ár eldiń salty basqa, ıtteri qara qasqa» demekshi, bizdegi modańyz...
...Qudaı berdi, jarııalylyq, demokratııa, naǵyz bostandyq alyp, tóbemiz kókke jetken de shyǵar...
Qazir, keremet! Kózimiz ashyldy, oı-sanamyz ilgeride – irkilmeımiz-aý, irkilmeımiz. Ashyq aıtamyz, irep soıamyz. Úlken-kishi demeı bet jyrtysýǵa baramyz, aq ıt kirip, kók ıt shyǵady, áıteýir aıtyp-aıtyp ádireńdep alamyz. Iá, bizdiń ermek, ermegi nesi – modamyz osy.
Osy bolǵanda, irkilip, oraǵytyp aıtqanymnan sezgen bolarsyz, modamyz – kez kelgen taqyrypqa únsiz qalmaı – pikir alysý, sóz talastyrý, estigen-bilgendi ortaǵa sap, oıran-topyr bolý. Keremet, rahat! Estıtiniń bar, biletiniń bar – tartylyp taryla bastaǵan sanań jipsip, oı-órisiń órge ekpindep óris izdep, ne kerek, mı qýysyńa qozǵalys bitip, kóńil túkpirińde shamshyraq jaǵylǵandaı bolady-aý.
...Qaýsatýdy qasymyzdan bastap, aldymen ujym basshysyn kókparǵa ilemiz. Demokratııanyń arqasy, basekeńdi júnin julǵan taýyqtaı etemiz. Biz bas qossaq, modamyzǵa moıyn bursaq, basekeńniń betin birer saǵatta beri qaratyp, qalaýymyzsha ılep-túırep, keregimizshe kertip-jonyp alatyn haldemiz.
...Odan aýyl asyp, aýdanǵa qolqa salý qıyn emes. Jıyp-terip synap, jarysa aıtyp, tóńkere kóterip, túgin qaldyrmaı túgesilip, aqyry aýdan basyn nókerlerimen qosyp aıdap ıt jekkenge jetkizip tastap tympı oınaı qalamyz.
...Oblysty synamasyn dep otyrǵan kim bar. Aınalaıyn, jarııalylyqtyń arqasynda ony da bir kúndegi basqosýdyń talqysyna sap talqan etken kúnimiz de bolǵan.
Keremettigi, ashyna sóıleımiz, kózge nuqyp ta, keı-keıde shuqyp ta shart ketetinimiz bar. Ashýǵa býlyǵyp, aramyzdan qany basyna teýip sóılep turyp-aq tili kúrmelip qulap qalatyndar da bolady.
Oblysty da oraǵytyp ótip árige ketip ákireńdegende, áı, taı-tuıaǵymyz qalmaıdy. Moda emespe, kim-kimniń de odan qalys qalǵany jaramsyz – dep qalady, siltep qalady, sileıtip salady. Buryndary erdiń eri ǵana bas basekeń týraly birdeńe dep erin qybyrlata qoıýy – áı, neǵaıbyl boldy emespe. Qazir, tartynbaımyz, múmkindik bop reti kelse, árkim-aq betine aıtyp, bet-perdesin sypyrýǵa saqadaı-saı.
...Bulaı bas qosýymyz, basynda biren-saran bolýshy edi, qazir tipten údep, kún belgilep, oryn belgilep, aldyn ala kelisip-piship baryp birigetin boldyq. Nege ekenin, bolatyn kúndi kútip taǵat taýsylady. Tózip-shydap, áıteýir jetip jyǵylamyz.
Ne kerek, bunymyzdyń burys-durysyn bilip baǵyt berip baqylap otyrǵan baqa basty eshkim joq. Áıteýir erkindik. Kókeıge qona ma, qonbaı ma, ony da oı eleginen ótkizip jatqan jan joq – deý paryz, aıtý maqsat.
Kásibimiz de jaıyna qaldy, kerek bolsa, kez kelgen ýaqytta bas qosyp modamyzdy iske asyrýǵa tolyq quqylymyz... О́ıtkeni kóppiz, óıtkeni ol bizdiń birden-bir ermegimiz... ermegi nesi, modamyz!..
Iá, shynymyzdy aıtsaq, bunymyz boıymyzǵa tarady, qanymyzǵa sińdi. Múmkin, tamaq ishpeı birneshe kúnge shydaýǵa bolar, biraq birneshe kún bas qosyp baquldaspaý, bul degen múmkin emes zat bop ornyqty... Iаǵnı biz de pendemiz, bizdiń de modadan qalǵymyz kelmeıdi...
Oıpyr-aı, óz basym, osy modamyz bolmaǵanda, týrasyn aıtsam, ish qusa bop óletin pendeniń birimin. Osyny taýyp bergen, kózimizdi ashqan, kóńilimizge sańlaý júgirtken zaman-ýaqyttan aınaldym.
Berik SADYR
