Bilim mekemesi 1966 jyly ashylǵanymen, tarıhy sonaý 1957 jyldan bastalady. Sol jyldyń jazynda orystyń ataqty jazýshysy Konstantın Sımonov Myrzashólge kelip, alǵashqy tyń ıgerýshilermen tanysty. 2000 jylǵy 23 mamyrdan bastap, oqý ordasy Úkimettiń №775 qaýlysymen qazaqtyń birtýar uly Mustafa Shoqaı esimimen ataldy. Qazir bilim ordasyn bilikti pedagog Uljalǵas Primbekova basqarady.
Jyl saıyn birneshe ondaǵan túlekti úlken ómirge qanattandyryp otyrǵan bilim uıasy talaı talantty shákirttiń shyraǵdanyn jaqty. Olardyń úmitin úkilep, dúbirli dodalarǵa qosty. Shákirtterimizdiń arasynda túrli mamandyq ıeleri bar.
Búginde bilim sapasy joǵary, bilikti ustazdar sabaq beretin mekteptiń qol jetkizgen jetistigi az emes. 2023–2024 oqý jylynda 6 oqýshy «Altyn belgi» alsa, 2 oqýshy «Úzdik attestat» ıegeri. Bıylǵy oqý jylynda ozat oqýshylarymyzdan osyndaı úmit kútip otyrmyz.
Bizdiń mektepte tárbıe isi jaqsy jolǵa qoıylǵan. Basty maqsatymyz – oqýshynyń dúnıetanymdyq qabiletin damytý arqyly oqý men tárbıe jumysyndaǵy jańashyl is-áreketpen shyǵarmashyl tulǵa tárbıeleý. Ásirese «Birtutas tárbıe» baǵdarlamasy aıasynda birneshe baǵytty qamtyǵan is-shara uıymdastyryldy.
Aıtalyq, tárbıe jumysynda ákeniń orny bólek. Otbasynda balasynyń bolashaǵyna kóbirek kóńil bólgen ákeler mektepte ótken is-sharalarǵa, jalpy tárbıe jumystaryna barynsha atsalysady. Bul – óte qýanarlyq jaıt. Jýyrda mektepte «Ákeler keńesi» ótti. Oǵan Jyly sý aýyly ardagerler keńesiniń tóraǵasy O.Myrzalıev, aýyldyń aǵa bıi E.Bıbolov, aýyl ákiminiń orynbasary A.Aldeshov, aýyldyq polısııa ınspektory N.Ormanov, Ákeler keńesiniń tóraǵasy A.Súttibaev jáne mekteptiń ata-analary qatysty. Onda qoǵamdaǵy er-azamattardyń rólin arttyrý týraly aıtyldy. Sonymen birge ulttyq qundylyq arqyly zamanaýı, parasatty ákelerdiń jańa bet-beınesin qalyptastyrý máseleleri sóz boldy.
– Qazir bala tárbıesinde áke róli álsirep barady. Mekteptegi ata-analar jınalysyna tek analar keletini de belgili. Osyǵan baılanysty tárbıe jumysymen tek ustazdar ǵana emes, otbasynda ákeler de aınalysýy kerek, – dedi mektep dırektorynyń tárbıe jumystary jónindegi orynbasary Baýyrjan Áýelbekov.
Keńeste aýyldyq ardagerler keńesiniń tóraǵasy O.Myrzalıev bala tárbıesinde ákeler róli shynynda da tómendep ketkenin, balanyń keleshekte myqty azamat bolýy úshin jasynan áke tárbıesin kórip, al ákeler balasyna qaı kezde de úlgi kórsetýi kerektigine nazar aýdardy. Sondaı-aq «Esirtki tutyný, temeki shegý, alkogolızmniń aldyn alý» taqyrybyna baılanysty joǵary synyp oqýshylaryna arnaıy jıyn ótti.
Búginde Myrzashól jetkinshekteriniń juldyzyn jaǵyp, shamshyraǵyn jarqyratqan bilim mekemesiniń qurylǵanyna alpys jyldan asa ýaqyt ótti. Osy aralyqta irgesi myqty, bilikti pedagogter qyzmet isteıtin oqý ordasy biraz bıikti baǵyndyrdy. Ult qaıratkeriniń esimin ıelengen mekteptiń alda da alar asýy bıik, maqsaty aıqyn, bolashaǵy jarqyn deýge ábden laıyqty.
Bolat SERALIEV,
M.Shoqaı atyndaǵy №26 orta mektebi dırektorynyń tárbıe jumystary jónindegi
orynbasary
Túrkistan oblysy
