Kelesi sársenbide depýtattarǵa Salyq kodeksi jáne oǵan ilespe salyq máseleleri boıynsha túzetýler jobasyn birinshi oqylymda qaraý usynylady. Salyq kodeksi jobasyn Úkimet Memleket basshysynyń 2022 jáne 2023 jyldardaǵy Qazaqstan halqyna arnaǵan Joldaýlarynda berilgen tapsyrmalardy oryndaý maqsatymen ázirlegen. Ol 822 baptan turady jáne qazirgi Salyq kodeksi men ony qoldanysqa engizgen zańnyń kúshin joıady.
Kodeks jobasynda keıbir salalardaǵy salyq tóleýshiler úshin korporatıvtik tabys salyǵy mólsherlemesin saralaý, óńdeý ónerkásibin damytýǵa jáne paıdany jańǵyrtýǵa qaıta ınvestısııalaýdy yntalandyrý maqsatymen salyqtyq shegerimderdi keńeıtý kózdelgen.
Sondaı-aq salyqtar men bıýdjetke tólenetin basqa da mindetti tólemderdiń sanyn qysqartý, barlyq arnaıy salyqtyq rejimderdi ońtaılandyrý, salyq jeńildikterin berý júıesin baqylaý men taldaýdyń jańa tásilderin engizý, qymbat múlikke, alkogol jáne temeki ónimderine salyq mólsherlemelerin arttyrý usynylady. Salyqtyq ákimshilendirýdi jetildirýge baǵyttalǵan basqa da birqatar norma men shara qarastyrylǵan.
Al ilespe zań jobasy aıasynda 3 kodeks pen 19 zańǵa ózgerister engizý usynylady.
Osy kúni depýtattar qarjy naryǵyn damytý jáne qarjylyq qyzmetterdi tutynýshylardyń quqyqtaryn qorǵaý máseleleri jónindegi zań jobasyn ekinshi oqylymda qaraıtyn bolady. Zań jobasyn talqylaý barysynda depýtattar birneshe norma usyndy. Atap aıtqanda, tutynýshylyq kepilsiz onlaın-nesıeler berý kezinde «salqyndatý kezeńin» (jıyrma tórt saǵat) engizý, sondaı-aq nesıe alýǵa alǵash ret júgingen azamattardyń bank nemese mıkroqarjy uıymynyń bólimshesine jeke kelýin mindetteý máseleleri kóterildi.
Sonymen qatar azamattardyń jekelegen sanattaryna kepilsiz tutynýshylyq qaryzdardy olardyń «elektrondyq úkimet» portaly arqyly resimdelgen kelisiminen keıin ǵana berý talaptary qarastyrylǵan (21 jasqa tolmaǵan jáne 55 jastan asqan azamattarǵa).
Buǵan qosa halyq qalaýlylary alaıaqtyq operasııalarǵa qarsy is-qımyl sharalaryn kúsheıtýge baǵyttalǵan, onyń ishinde antıfrod-ortalyqtyń qyzmetine jáne qaryz alýshylardyń quqyqtaryn qorǵaýǵa baılanysty birqatar norma usyndy.
Jalpy, otyrysta quqyq buzýshylyqtardyń aldyn alý jáne ǵylymdy qajet etetin aımaqtardy damytý máseleleri boıynsha jańa zań jobalary jumysqa qabyldanbaq.
