Rasynda bul bir rettik naýqan emes, muny – halyqtyń ekologııalyq mádenı sanasyn qalyptastyratyn ulttyq ıdeıa dep túsinýge bolady. Aıtýly aksııa aıasynda Semeı qalasynyń turǵyndary senbilikke shyqty.
Abaı oblysynda jalpyóńirlik tazalyq aksııasy bastaldy. Senbilikke memlekettik mekeme qyzmetkerleri, bilim berý mekemeleri, shaǵyn jáne orta bıznes nysandarynyń ókilderi, qoǵamdyq jáne jastar uıymdary, oblystyq, qalalyq jáne aýdandyq máslıhat depýtattary jáne jalpy turǵyndar da aksııaǵa belsendi atsalysty.
Semeı qalasynda ótken tazalyq jumysynda jurtshylyqpen birge oblys ákimi Berik Ýálı de qatysty. Aımaq basshysy keshe, 4 sáýirde oblys turǵyndaryna arnaıy úndeý jasap, jalpyóńirlik tazalyq aksııasy bastalatynyn jarııalaǵan edi.
Oblys ortalyǵynda ótken senbilikte aımaq basshysy bul tazalyq aksııasy bir rettik emes, jyl boıy jalǵasatynyn aıtty.
«Biz osy jalpyóńirlik aksııany bastaǵan kezde «Turǵyndar qalaı qabyldar eken?!» dep qobaljyǵanymyz da ras. Biraq oılaǵanymyzdan asyp tústi. Halyq osyny kútip júrgendeı bastamany ilip áketti. Tipti otbasylyq chattarǵa deıin tarap, bir birlerin tazalyq aksııasyn qoldaýǵa shaqyryp jatqan halyqtyń shynaıy yqylas-peıilin ańǵardyq. Bul bizdiń bastamamyzdyń halyqpen úndeskenin kórsetedi. Jaqsy bastalǵan isti ári qaraı júıeli túrde jalǵastyramyz», dedi aımaq basshysy.
Tazalyq aksııasy qalanyń barlyq aýdandaryn qamtydy. Máselen, Abaı oblysynyń jumyspen qamtý jáne áleýmettik baǵdarlamalar basqarmasy men oǵan qarasty mekemeler oblys ákiminiń eldi abattandyrý jónindegi úndeýin qoldap, Jańasemeı aýmaǵyndaǵy senbilikke qatysty.
– Ákimniń úndeýi – ár azamatqa ortaq jaýapkershilik júkteıdi. Qala tazalyǵyna úles qosý – bizdiń azamattyq mindetimiz, – dedi Eńbek mobıldiligi ortalyǵynyń basshysy Erkebulan Tursyn.
Al Semeıdegi «Beıbitshilik» aralynda ótken senbilikke 300-ge tarta jas qatysty. «Abaı Jastary» resýrstyq ortalyǵy uıymdastyrǵan bul is-shara – aımaq basshysynyń óńirdi kógaldandyrý men tazalyqty saqtaý jónindegi úndeýin qoldaýdyń naqty kórinisi boldy.
– Tabıǵat – ortaq baılyǵymyz. Árbir jas urpaq ony qorǵap, uqyptylyqpen qaraýǵa mindetti. Biz aımaq basshysynyń bastamasyn tolyq qoldaımyz. Osyndaı senbilikter arqyly óńirimizdi kórkeıtip, qoǵamǵa úlgi kórsetemiz, – dedi «Abaı Jastary» resýrstyq ortalyǵynyń dırektory Aıdos Tóleýhanov.
Jastar qoldaryna kúrek-ketpen alyp, aral aýmaǵyn qoqystan tazalap, aǵash otyrǵyzýǵa da atsalysty
Ákimniń úndeýinde aıtylǵandaı, aksııa barysynda arnaıy baıqaý jarııalanyp, «úzdik aýdan», «úzdik aýyl», «úzdik aýla», «úzdik ýnıversıtet», «úzdik kolledj», «úzdik mektep», «úzdik balabaqsha», «úzdik kóshe», «úzdik mekeme», taǵy basqa da nomınasııalar boıynsha tazalyq janashyrlary anyqtalady. Jyl sońynda jeńimpazdarǵa qomaqty syılyqtar tabystalady.
Abaı oblysy
