BBC jazǵandaı, Hands Off («Qolyńdy tart») atty naýqan uıymdastyrýshylary bul aksııalardy eldiń 50 shtatynyń bárinde 1200 jerde ótkizýdi josparlaǵan. Senbi kúni Boston, Nıý-Iork, Chıkago, Los-Andjeles pen Vashıngton qalalarynda halyq kóptep jınaldy.
AQSh-tyń iri qalalarynda turatyn halyq arasynda Trampqa qarsy kózqarastaǵy adamdar basym. Alaıda sońǵy aılarda ashyq narazylyqtar sırek bolǵan.
Tramp ımportqa joǵary kedendik tarıf engizgen soń, basqa elderde de – atap aıtqanda, London, Parıj jáne Berlınde – oǵan qarsy yntymaqtastyq mıtıngileri ótti. Vashıngtonda ótken mıtıngte Demokratııalyq partııanyń zań shyǵarýshylary sóz sóıledi. Olar ásirese Trampqa demeýshilik jasaıtyn baı adamdardyń, sonyń ishinde Ilon Masktiń yqpalyn kóp atap ótti. Florıdadan saılanǵan kongressmen Maksvell Frost bul jaǵdaıdy «úkimetimizdiń mıllıarderlerge jutylýy» dep atady.
Senbi kúni Tramptyń ózi eshqandaı kópshilik sharalarǵa qatysqan joq. Immıgrasııalyq polısııa ICE-niń mindetin atqarýshy basshysy Tom Hoýman bul narazylyqtarǵa qatysty Fox News konservatıvti arnasyna bergen suhbatynda pikir bildirdi.
- Olar bos turǵan úıdiń aldynda qansha qalasa, sonsha narazylyq bildire alady. Narazylyq pen mıtıngiler eshteńe ózgertpeıdi. Sondyqtan olar sóz bostandyǵy quqyqtaryn paıdalana bersin. Biraq bul túkke turmaıdy, -dedi.
