Elimizden jahandyq dodaǵa 11 boksshy qatysyp, 3 altyn, 3 qola medal oljalady. Erler dodasynda Nursultan Altynbek talantymen kózge tústi. 55 kg salmaqta jekpe-jek ótkizgen jerlesimiz fınaldyq tartysta álem chempıony, ózbekstandyq Mırazızbek Mırzahalılovtan basym túsip, álem kýboginiń ıegeri atandy. 85 kg salmaqta Dáýlet Tólemisov fınaldyq jekpe-jekte ózbek boksshysy Akmoljon Isroılovty jeńdi. Jartylaı fınalda Dáýlet fransııalyq sportshy Abdýlla Traorıdi 2-raýndta nokaýtpen utqan edi.
Erler komandasyna qos altynǵa qosa eki qola medal buıyrdy. Dıas Moljigitov (80 kg) jartylaı fınaldyq jekpe-jekte О́zbekstan úmiti Javohır Ýmmatalıevke ese jiberse, Danııal Saparbaı da (+ 90 kg) ózbekstandyq Jahongır Zokırovten asa almady.
Áıelder arasyndaǵy tartysta Jazıra Oraqbaeva (51 kg) tájirıbeli boksshy ekenin dáleldep altyn medal enshiledi. Jartylaı fınalda polshalyq Natalıa Kýzevskany jeńdi. Italııalyq boksshy Elen Lýchııa Aıarı fınaldyq jekpe-jekten bas tartyp, jerlesimiz jeńimpaz dep tanyldy. 57 kg salmaq dárejesinde synǵa túsken boksshymyz Uljan Sársenbek jartylaı fınalda polıak qyzy Iýlııa Sheremetadan asa almady.
- 9-15 sáýir aralyǵynda Shotlandııanyń Damfrıs qalasynda shaıbaly hokkeıden IV dıvızonyndaǵy álem chempıonaty ótedi. Jerlesterimiz tusaýkeser kezdesýin Ońtústik Koreıaǵa qarsy ótkizedi. Odan keıin Italııa (10 sáýir), Ulybrıtanııa (12 sáýir), Latvııa (13 sáýir), Slovanııamen (15 sáýir) saıysqa túsedi. Osylardyń arasynan ozyp shyqqan jalǵyz ǵana komanda kelesi maýsymda IA dıvızıonynda kúsh synasý quqyǵyna ıe bolady.
- FIFA-nyń reıtıngi jańartyldy. Fýtboldan ulttyq quramalar arasyndaǵy kóshbasshy ózgergen joq. Argentına (1886,16 upaı) áli de alda keledi. Ekinshi, úshinshi orynda – Ispanııa (1854,64) men Fransııa (1852,71). Sondaı-aq TOP-10 komandanyń qataryna Anglııa (1819,2), Brazılııa (1776,03), Nıderland (1752,44), Portýgalııa (1750,08), Belgııa (1735,75), Italııa (1718,31), Germanııa (1716,98) enip otyr. Elimizdiń quramasy ótken aımen salystyrǵanda taǵy úsh satyǵa, 113-orynǵa (1177,66) syrǵydy. Salystyrmaly túrde alsaq, О́zbekstan (57-oryn) men Qyrǵyzstan (103-oryn), tipten Tájikstannyń (104-oryn) ózi jerlesterimizden joǵary tur.
- Malaızııanyń Kıchıng qalasynda «World Junior Tennis Competition 14&under» týrnıri márege jetti. Azııa jáne Muhıt jaǵalaýy aımaǵy boıynsha álem birinshiliginiń irikteý saıysy sanalatyn jarysta elimizdiń jas tennısshileri tabysty óner kórsetti. D tobyndaǵy qyzdarymyz О́zbekstan (3:0), Iran (3:0), Aýstralııa (2:1) quramalaryn qapy qaldyryp, birinshi oryndy ıelendi. Jasyl qurlyq ókilderine qarsy ótken sheshýshi básekede Iаsmın Dúısembaeva men Tamına Sáken jeńiske jetse, Marııam Nurjan men Iаsmın Dúısembaeva juptyq oıynda ese jiberdi. Shırek fınaldyq saıysta jerlesterimiz Ońtústik Koreıa quramasymen sheberlik baıqasady.
- Argentına astanasy – Býenos-Aıreste nysana kózdeýden Álem kýboginiń kezeńdik saıysy ótip jatyr. Jarysta elimizdiń namysyn Valerıı Raqymjan, Arına Altýhova, Elızaveta Bezrýkova, Nıkıta Chırıýkın, Eldar Imanqulov, Artemıı Kabakov, Aleksandra Le, Konstantın Malınovskıı, Islam Sátpaev, Valerııa Popelova, Nıkıta Shahtorın, Sofııa Shýljenko, Irına Iýnýsmetova, Rýslan Iýnýsmetov syndy sportshylar qorǵaıdy. A.Altýhova 50 metr qashyqtyqtan kózdep atýda 445,9 upaı jınap, qola medal oljalady. Altyndy 458,6 upaı alǵan úndistandyq Kaýr Samra enshilese, kúmis júlde germanııalyq Anıta Mangoldke (455,3) buıyrdy.
- Dinmuhammed Raıymqulov frıastaıl-akrobatıkadan Eýropa kýboginde tabysty óner kórsetti. Shveısarııanyń Aıroloda qalasynda ótken qurlyq dodasynda jerlesimiz 1 altyn, 1 kúmis medal ıelendi. Saıystyń birinshi kúni 86,58 upaı jınap, kúmisti qanaǵat tutty. Altyn medal 93,6 upaı alǵan ýkraınalyq Maksım Kýznesovke buıyrǵan edi. Saıystyń ekinshi kúni D.Raıymqulov 96,58 upaımen Eýropa kýboginiń altynyn enshiledi.
