Kezdesý barysynda Máýlen Áshimbaev Qazaqstan men Serra-Leone arasynda dıplomatııalyq qarym-qatynas ornaǵaly beri ortaq qundylyqtar men múddege negizdelgen ózara syndarly dıalog qalyptasqanyn atap ótti. Suhbat kezinde parlamentaralyq yntymaqtastyq, onyń ishinde dostyq toptarynyń ózara is-qımyly ekijaqty baılanysty odan ári nyǵaıtýdyń mańyzdy tetigi ekeni aıtyldy.
«Parlamentaralyq dıalog elderimiz arasyndaǵy yntymaqtastyqty damytýda mańyzdy ról atqarady. Afrıka elderimen, onyń ishinde Serra-Leonemen yntymaqtastyqty nyǵaıtý maqsatymen Senatta dostyq tobyn qurdyq. Ekijaqty ózara is-qımyldy arttyrý jolynda dostyq toptarynyń áleýetin tıimdi paıdalanýǵa zor múmkindik bar. Biz aldaǵy ýaqytta elderimizdiń parlamentteri arasyndaǵy yntymaqtastyqty júıeli jolǵa qoıyp, damytýǵa daıynbyz», dep palata spıkeri Serra-Leone eline BUU Bas Assambleıasynyń «Ortalyq Azııa men Aýǵanstan úshin Ornyqty damý maqsattaryna qol jetkizý jónindegi BUU óńirlik ortalyǵy» týraly qararyn birlesip jazǵany úshin rızashylyǵyn bildirdi.
Sonymen qatar taraptar Qazaqstan men Serra-Leone arasyndaǵy yntymaqtastyqtyń perspektıvalyq baǵyttaryna nazar aýdaryp, saýda-ekonomıkalyq baılanystardyń áleýetin tolyq paıdalaný máselesin talqylady. Osy oraıda Orta dáliz retinde belgili Transkaspıı halyqaralyq kólik marshrýtynyń múmkindikteri týraly sóz boldy.
Suhbat kezinde taý-ken óndirisi, paıdaly qazbalardy óndirý, bilim berý, aýyl sharýashylyǵy, aqparattyq tehnologııalar jáne sıfrlandyrý salalaryndaǵy birlesken jobalardy iske asyrý máselelerine de mán berildi.
Odan bólek, 17-18 qyrkúıekte Astanada ótetin «Dinder dıalogi: bolashaq jolyndaǵy sınergııa» taqyrybyna arnalǵan Álemdik jáne dástúrli dinder kóshbasshylarynyń VIII sezi jáne rýhanı dıplomatııa máseleleri áńgimege arqaý boldy.
