Foto: Ashyq derekkóz
«Aýyl» partııasynyń fraksııasy Parlamenttegi jumysynyń alǵashqy kúnderinen bastap aýyl sharýashylyǵy taýaryn óndirýshilerdiń salyqtyq jaǵdaıyn jaqsartýdy júıeli túrde kóterip kelgen. Fraksııanyń belsendi usynystary Úkimet tarapynan eskerilip, tıimdi dıalog ornaǵany atap ótildi.
«Búginde fraksııamyz usynǵan usynystardyń edáýir bóligi eskerilip, Úkimetpen ornaǵan ózara tıimdi, ári syndarly árekettestik úshin rızashylyǵymyzdy bildiremiz», dedi depýtat.
Degenmen, fraksııa mańyzdy bir máselege erekshe nazar aýdarýdy usyndy. Atap aıtqanda, Úkimettiń aýyl sharýashylyǵy ónimderine nóldik mólsherleme boıynsha QQS engizý bastamasyna qatysty bıznes ókilderi alańdaýshylyq bildirip otyr.
«Biz agrarlyq bıznes sýbektilerimen jan-jaqty saraptamalyq jumys júrgizdik. Kásipkerler tarapynan kóptegen ótinish kelip tústi. Olar nóldik QQS mólsherlemesi agrarshylar úshin qosymsha qıyndyqtar týǵyzatynyn, bul shara shyn máninde salyqtyq júktemeni arttyratynyn jetkizdi», dedi Qaraqat Ábden.
Onyń aıtýynsha, QQS-tan tolyq bosatý men nóldik mólsherleme – eki túrli salyqtyq rejım, ári olardyń saldary da múlde bólek. Nóldik mólsherleme jaǵdaıynda aýyl sharýashylyǵy taýaryn óndirýshiler kiristegi QQS-ty qaıtaryp alý múmkindiginen aıyrylady. Bul ásirese óndiris shyǵyny joǵary ári maýsymdyq sıpattaǵy sala úshin óte sezimtal másele.
Fraksııa usynǵan balama sheshim
«Aýyl» partııasy fraksııasy QQS mólsherlemesin 16% deńgeıinde saqtap, sonymen qatar salyqtyq esepten shyǵarý úlesin burynǵy 70%-dan 80%-ǵa deıin arttyrýdy usyndy.
«Bul – salyqtyq júktemeni jeńildetýdiń naqty mehanızmi. Bir jaǵynan fıskaldyq tártip buzylmaıdy, ekinshi jaǵynan aýyldaǵy kásipkerlerdiń qarjylyq turaqtylyǵy saqtalady. Eń bastysy bul salada ınvestısııalyq motıvasııa joǵalmaıdy», dedi depýtat.
Sonymen qatar, Qaraqat Ábden agrarlyq sala sýbektilerine salyqtyq rejımdi óz erkimen tańdaýǵa múmkindik berilýi tıis ekenin atap ótti. Ol Úkimettiń arnaıy salyq rejımin engizip, aýyl kásipkerleri úshin jeńildikti sharttar jasaǵanyna rızashylyq bildirdi. Bul normalar aýyldaǵy shaǵyn jáne orta bıznestiń turaqtylyǵy men damýyna eleýli qoldaý bolatynyn da atap ótti.
«Aýyl» partııasy zań jobasynyń ekinshi oqylymynda belsendi qatysyp, agroónerkásiptik keshen múddesine saı tetikterdi quqyqtyq ári ekonomıkalyq turǵydan jetildirý úshin nátıjeli jumys júrgizýge daıyn ekendigin málimdedi.
«Bizdiń basty maqsatymyz — aýyl sharýashylyǵy taýaryn óndirýshilerdiń múddesin eskeretin, sonymen birge ulttyq ekonomıkanyń uzaq merzimdi basymdyqtaryna saı keletin teńgerimdi salyqtyq rejım qalyptastyrý», dedi Qaraqat Ábden.
Qaraqat Ábden sóz sońynda agrarlyq sektordyń el damýyndaǵy orny erekshe ekenin atap ótip, fraksııa atynan Salyq kodeksiniń birinshi oqylymyn qoldaýǵa shaqyrdy.
«Usynylyp otyrǵan zań jobasy – strategııalyq mańyzdy qujat. Sondyqtan biz, «Aýyl» fraksııasy, ony qoldaımyz jáne áriptesterimizdi de birlik pen yntymaqtastyq tanytýǵa shaqyramyz», dedi ol.
