Marat Qarabaevtyń aıtýynsha, byltyr kóliktiń barlyq túri boıynsha tasymal kólemi 6 paıyzǵa ósken. Transkaspıı halyqaralyq kólik dálizi arqyly júk tasymaldaý 62 paıyzǵa ulǵaıyp, 4,5 mıllıon tonnany qurady. Almaty, Qyzylorda jáne Shymkent qalalarynyń áýejaılarynda 3 jańa jolaýshylar termınaly salyndy. 12 myń shaqyrym jol jóndeldi. Qaraǵandy – Almaty, Taldyqorǵan – О́skemen, Aqtóbe – Qandyaǵash jáne Atyraý – Astrahan tas joldaryndaǵy jańǵyrtý jumystary aıaqtaldy.
Mınıstrdiń málimetinshe, otandyq áýe kompanııalary 14,7 mıllıon jolaýshyny tasymaldaǵan. Bul sektordaǵy kórsetkish 10 paıyzǵa ulǵaıǵan. Áýejaılarda 29,7 mıllıon adamǵa qyzmet kórsetilgen, ıaǵnı 14 paıyzǵa artqan. Temirjol kóligimen 21 mıllıon jolaýshy tasymaldanyp, ósim 3,9 paıyzdy quraǵan.
Qasym-Jomart Toqaevqa bıyl vedomstvonyń Eýropa, Azııa jáne Taıaý Shyǵys elderine 19 jańa áýe baǵytyn ashýdy josparlap otyrǵany jóninde baıandaldy. Katonqaraǵaı, Zaısan jáne Kendirli áýejaılarynyń qurylysy bastaldy. Sonymen qatar 125 temirjol beketin jańǵyrtý jumystary qolǵa alynady. Dostyq – Moıynty, Almaty aınalma temirjoly, Darbaza – Maqtaaral, Aıagóz – Baqty jáne Qyzyljar – Moıynty sekildi 5 iri temirjol jobasy júzege asyrylyp jatyr.
Kezdesý sońynda Prezıdent qazaqstandyqtardyń jol júrýine anaǵurlym qolaıly jaǵdaı jasaý, týrıstik nysandarǵa qoljetimdilikti qamtamasyz etý qajet ekenin atap ótti.
Memleket basshysy Ortalyq – Batys avtojolynyń qurylysyn jedeldetý, Batys Eýropa – Batys Qytaı dálizin keńeıtý, Transkaspıı halyqaralyq kólik dálizin damytý, ishki jáne halyqaralyq áýe reısteriniń sanyn kóbeıtý, kólik sektoryna ınvestısııa tartý jumysyn kúsheıtý jóninde tapsyrma berdi.
Qasym-Jomart Toqaev kólik-logıstıka salasyn órkendetýdiń, sondaı-aq kólik ınfraqurylymyn jańǵyrtý jobalaryn sapaly ári ýaqtyly júzege asyrýdyń mańyzyna erekshe nazar aýdardy.
