Foto: Mádenıet jáne aqparat mınıstrligi
Kezdesý barysynda qatysýshylar Memleket basshysy Qasym-Jomart Toqaev Ulttyq quryltaıdyń IV otyrysynda aıtqan ıdeıalardy júzege asyrýǵa baǵyttalǵan uıymnyń jumysy men naqty josparlaryn, sonymen qatar Jeńistiń 80 jyldyǵy boıynsha daıyndyq máselelerin talqylady.
Aıda Balaevanyń aıtýynsha, Prezıdenttiń tapsyrmasyna sáıkes, vedomstvo arnaıy jobany daıyndaýdy bastaǵan. Bul qujatta memlekettiń ıdeologııalyq jumysyndaǵy maqsat-mindetter men basymdyqtar aıqyndalady.
Sondaı-aq mınıstrlik tarapynan vedomstvolyq marapattardy tapsyrý júıesin retteý jáne marapattalǵandar tizimin júrgizý boıynsha jumystar júrgizilip jatyr. Parlament qaraýyna onomastıka salasy men qaıyrymdylyq qarajattaryn jınaýdyń ashyqtyǵyna baǵyttalǵan zań jobalarynyń toptamasy usynyldy.
Kınoındýstrııany memlekettik qarjylandyrýdyń ashyqtyǵyn arttyrýǵa baǵyttalǵan «e-Kıno» biryńǵaı monıtorıng júıesi ázirlendi. Sonymen qatar, Qazaqstan mýzeıleriniń vırtýaldy jelisi – «e-Museum» veb-portaly tanystyrylatyn bolady
Jeńistiń 80 jyldyǵyn merekeleýdiń ulttyq baǵdarlamasy sheńberinde jyl boıy elimizdiń barlyq óńirlerinde eki myńǵa jýyq is-shara ótkizý josparlanyp otyr. Jeńis kúni men Otan qorǵaýshylar kúnine arnalǵan saltanatty konsert uıymdastyrylady. «Qazaq eli» monýmenti alańynda áskerı parad ótedi, ol elimizdiń barlyq iri telearnalarynan tikeleı efırde kórsetiledi.
«Batyrlarǵa taǵzym» portalynyń qyzmeti keńeıtildi. 27 naýryzdan bastap «Qazaqstan» telearnasynda «Erjúrek esimder» jobasy iske qosyldy. Atalǵan joba aıasynda arna efırinen ekinshi dúnıejúzilik soǵysynyń batyrlary jaıly 80 beınerolık kórsetiledi.
«Qazaqfılm» kınostýdııasy óńirlik kınoteatrlarda kórsetiletin 19 ulttyq fılmnen turatyn arnaıy toptama ázirledi.
