Tennıs • 11 Sáýir, 2025

Aýstralııadan basym tústi

30 ret

kórsetildi

3 mın

oqý úshin

Jasyl qurlyqtaǵy Brısben qalasynda tennısten Bıllı Djın Kıng kýboginiń irikteý saıystary bastaldy. Álem chempıonatyna balanǵan jarysqa joldama alý jolynda Qazaqstannyń áıelder komandasy Aýstralııa jáne Kolýmbııa quramalarymen bir topqa tústi.

Egemen Qazaqstan

Jarystyń negizgi bóliginiń joldamasy tek top jarǵan komandaǵa ǵana buıyrady. Sol sebepti de irikteý týrnırinde jerlesterimiz barynsha tabysty óner kórsetýge tıis. Osy oraıda, basty básekelesimiz Aýstralııa quramasy ekenin aıta ketken abzal. Jasyl qurlyq ókilderi Bıllı Djın Kıng kýboginde jeti ret bas júldeni oljalady. Bul tabystardyń barlyǵyna olar ótken ǵasyrdyń 60-70 jyldary qol jetkizdi. Biraq soǵan qarap, «qazirgi kezde atalǵan memlekette tennıs quldyrady» degen oı týyndamaý kerek. Aýstralııalyqtar áli de azýly. Keıingi bes jylda olar Kıng kýboginiń fınalynda eki ret oınady. 2019 jyly Pertte Fransııadan utylsa, 2022 jyly Glazgoda Shveısarııaǵa ese jiberdi.

Aýstralııanyń qazirgi betkeustary – Darıa Kasatkına. Kúni keshe ǵana sol memlekettiń azamattyǵyn alǵan 27 jastaǵy reseılik tennısshi WTA týrnırlerinde jeti ret top jarǵan. Qazirgi kezde úzdikter tiziminde 14-orynda tur. Darıa 2018 jyly Ýımbldonnyń shırek fınalyna, 2022 jyly Rolan Garrostyń jartylaı fınalyna deıin jetti. Bıyl Aýstralııanyń ashyq birinshiliginiń tórtinshi kezeńinde kúsh synasty. Eldiń ekinshi raketkasy Kımberlı Bırrel (WTA №61) Germanııada týyp-ósti. Tizimde tórtinshi turǵan Aıla Tomlıanovıch (WTA №79) Horvatııanyń týmasy. Jergilikti oıynshylar arasynan Maııa Djoınt (WTA №78) pen Olıvııa Gadeskıdi (WTA №98) atap ótýge bolady. Olardyń barlyǵy – TOP-100-dikke enip otyrǵan tennısshiler.

Degenmen Brısbenge naǵyz babynda babynda barǵan Qazaqstan quramasy Aýstralııany esh qınalmaı utty. Iýlııa Pýtınseva Maııý Djoıntty jeńdi – 6:2, 6:1. Elena Rybakına Kımberlı Bırrelden basym tústi – 6:3, 7:6 (7:4). Juptyq saıysta Anna Danılına men Jibek Qulambaeva Storm Sanders/Ellen Peres jubyna ese jiberdi – 3:6, 4:6. Soǵan qaramastan jalpy esepte jerlesterimiz jeńis toıyn toılady.

Endi Kolýmbııaǵa qarsy oınaımyz. Atalǵan komandada jeńispen órilgen baı dástúr joq. Desek te Ońtústik Amerıka ókilderi arasynan Kamıla Osorıo (WTA №53) men Emılıana Arangony (WTA №84) atap ótýge bolady. 23 jastaǵy Kamıla kezinde jastardyń «Úlken dýlyǵa» sanatyndaǵy týrnırlerinde jeńiske jetip, álemdik reıtıngte kósh bastady. Áıelder arasyndaǵy WTA dodalarynda úsh márte mereıi ústem boldy. 24 jastaǵy Emılıana da túrli týrnırlerde aıshyqty ónerimen kózge túsip júr.