Sol ýaqytta SMG óndirisiniń ózindik quny tonnasyna 60–70 myń teńge aralyǵynda bolǵanymen, shekti kóterme baǵa tonnasyna 45 158 teńge dep bekitildi. Mınıstrlik osy jyldyń 1 qańtarynan bastap ózgerissiz qaldyrý týraly buıryq jobasyn jarııalady. Ol buıryq bıyl 30 maýsymǵa deıin turaqty saqtalady. О́ıtkeni baǵanyń ózgerýi zaýyttardyń da shyǵynǵa ushyraýyna ákeldi (zaýyttar tonnasyna 20 000–25 000 teńgege shyǵyndalady).
2025 jyldyń 1 aqpanynan bastap elimizdiń birqatar óńirinde avtogazdyń bólshek saýdadaǵy baǵasynda da ózgerister boldy. Astanada lıtri 82 teńgeden 102 teńgege, Almaty qalasynda 89 teńgeden 102 teńgege deıin kóterildi. Atyraý jáne Aqtóbe oblystarynda baǵa 59 teńgeden 77 teńgege qymbattady. Naryqtaǵy baǵanyń joǵarylaýyna birneshe sebep bar, onyń mańyzdylary – SMG óndirýdiń ózindik qunynyń joǵary bolýy jáne rentabeldiliktiń tómendeýi.
Jaqynda Energetıka mınıstrligi men «Teńizshevroıl» JShS kelisimge qol qoıdy. Taraptar júrgizgen kelissóz nátıjesinde jyl saıyn ishki naryqqa suıytylǵan gaz jetkizilmek.
«Kelisimniń jasalýy – respýblıkanyń suıytylǵan munaı gazyna degen ishki qajettiligin qamtamasyz etýdegi mańyzdy qadam. «Teńizshevroıldan» jetkiziletin kepildendirilgen gaz ishki naryqtaǵy tapshylyqty azaıtýǵa, osy ónimdi tutynýshylar úshin qolaıly jaǵdaı jasaýǵa múmkindik beredi», dedi Energetıka vıse-mınıstri Álibek Jamaýov.
TShO bas dırektory Kevın Laıonnyń sózinshe, «Teńizshevroıl» osy strategııalyq mańyzdy saladaǵy áleýetti múmkindikterdi zertteý úshin Qazaqstanmen yntymaqtastyqty jalǵastyrady. «Biz Energetıka mınıstrliginiń maqsattaryna qoldaý kórsetemiz, eldiń ónerkásiptik jáne ekonomıkalyq damýyna óz úlesimizdi qosýǵa tyrysamyz», deıdi Kevın Laıon.
