Júzin jalt berip keri buratyn fánı jalǵannan ózi ótse de, onyń úni qulaǵymyzda qalyp qoıǵanyn nesine jasyramyz? Qulaqtyń quryshyn qandyratyn sol bir móldir daýysty áli kúnge deıin saǵynatynymyz, ánderin qaıyra tyńdaǵanda qý medıen dalada jalǵyz qalǵan shaǵaladaı sharq uratynymyz taǵy bar. Ondaıda tóńirek túgel altyndanyp ketkendikten be, áıteýir mezgil men ánnen úılesim izdeı jónelemiz... Sol úılesimdi sanaýly shyǵarmadan ǵana tabamyz.
Ol jyldardyń ózine ǵana tán romantıkasy men talǵamy bar edi. Qaıda júrsek te sol eski ánder shyrqalyp jatatyn. Shlıagerge aınalǵan shyǵarmalar tyńdarman jadynan eshqashan óshpeıtini de aqıqat qoı. О́ıtkeni táýir dúnıeniń ǵumyry qashanda uzaq bolady emes pe. Aımańdaı ánshi Mádına Eralıeva shyrqaý shegine jetkize shyrqaǵan «Kúreń kúz» áni áli kúnge deıin eskirgen joq. Tula boıyńdy ótken shaqtyń elesi kezgen kezde áıgili ándi qaıta tyńdap, bir jasap qalamyz.
«Kúp-kúreń meniń reńim
Qosh endi, qosh bol, kúreń kún.
Jaz keler jáne jap-jasyl,
Qosh endi, qosh bol, kúreń kúz», dep bastalatyn nostalgııaǵa aınalǵan ádemi ánniń mátini kisi balasyn oılandyrmaı, tolǵandyrmaı qoımaıtyny anyq qoı.
Saǵymǵa aınalǵan sol bir jyldarda qazaqtyń aqıyq aqyny Muqaǵalı Maqataevtyń sózine jazylǵan ǵajap týyndyny júregimizben jyly qabyldap, tebirenip tyńdasaq ta, astaryna asa bir qatty mán bermegen sekildimiz. «Qosh endi, qosh bol, kúreń kún», dep bastalatyn tarmaqtyń salmaǵy sonshalyqty aýyr ekenin ol kezde qaıdan bileıik. Endi ǵoı, túısinip júrgenimiz.
Gúlnár Dáýkenova ánin jazǵan ǵalamat shyǵarmanyń tarıhy tragedııamen tamyr jalǵap jatqanyn shırek ǵasyr ýaqyt buryn eshkim sezbegen de, bilmegen de shyǵar. Derekke sensek, bul shyǵarma kompozıtordyń áriptesi jastaı baqıǵa bet túzegen shaqta týǵan kórinedi. Janǵa jara salǵan mezette jazylǵan ánniń astary tuńǵıyqqa batyratyny daýsyz. Bir sózben aıtqanda, áýenimen de, áýezimen de jan terbeıtin týyndy qoshtasý áni sekildi.
«Qosh endi, qosh bol, kúreń kúz,
Kúreń muń saǵan jiberdim.
Kúlermin dep em túnerdim,
Bilermin, qalaı bilermin», dep bastalatyn ánniń qaıyrmasy da tyńdarman júregine aýyr júk túsiretini ras. Taıtalas pen qaıshylyqqa toly ánshi taǵdyrynda ezýge kúlki úıiretin sátten góri, qarashyǵyna muń uıalatatyn kezder az bolmaǵany aqıqat qoı. Ánnen janynyń kúızeliske, senimi men seziminiń sergeldeńge túskenin ańǵarý da qıyn emes.
«Kúreń kúz» ánin Mádına Eralıevanyń oryndaýynda tyńdaǵan saıyn ózimizdiń de janymyz muń qursaýynda qalyp qoıatyny nesi eken? Saǵymǵa aınalǵan saǵynyshtaı bolǵan ánshiniń beınesin, únin saǵynǵandyqtan shyǵar, bálkim. Áıteýir, ishke túsken bir sezim shoǵy adam janyn jaı taptyrmaıtyny anyq.
Tyńdaǵan saıyn janyńdy qońyr muńnyń ińirine tarta túsetin «Kúreń kúz» áni estrada kóginde juldyzy jarqyraǵan Mádına Eralıevanyń da jaryq jalǵanmen qoshtasý ánine aınalǵandaı kórinetini ras. Osy án arqyly ol «ózimdi de, ónerimdi de umytpańdar» degendi tuspaldap aıtyp ketken be dersiń...
«Qosh endi, qosh bol, kúreń kúz,
Aq qysty tezdep jibergiz.
Aq qystaı appaq bir elmiz,
Shıryǵyp biraz júrermiz,
Qosh endi, qosh bol, kúreń kúz,
Shynyǵyp ómir súrermiz», degen tarmaq jurt jadynan esh ýaqytta óshpeıtini anyq. «Shıryǵyp biraz júrermiz» degen án áleminiń Aq Baıanynyń da baqılyq bolǵanyna biraz jyldyń júzi toldy.
Ýaqyttan asqan júıriktiń joq ekeni ras-aý. Zymyrandaı zýlaǵan jyldar kóshin keri bura almaǵanymyzben, saǵynysh sazyna aınalǵan tańdaýly týyndylar áli kúnge deıin júregimizdi, janymyzdy jylytyp turǵany aıdaı aqıqat. Shyn ónerdiń bir qudireti degenimiz de osy emes pe?
