Almaty qalasynyń Naýryzbaı aýdandyq sotynda áleýmettik jelilerdi paıdalaný arqyly ulttyq arazdyqty qozdyrdy dep aıyptalǵan azamat T.E.-ge qatysty qylmystyq is qaraldy (QK 174-baby 1-bóligi).
Sot anyqtaǵandaı, T.E. Instagram paraqshasynyń 34 myńnan astam oqyrmany bar paraqshasynyń ákimshisi bola otyryp, basqa ult ókilderiniń ulttyq abyroıy men qadir-qasıetin kópshilik aldynda qorlaýǵa baǵyttalǵan, dóreki, balaǵat sózdermen jazylǵan mátini bar mýzykalyq kompozısııamen birge post jarııalaǵan.
Mundaı áreketter Qazaqstan Respýblıkasynyń negizgi qaǵıdattarynyń biri bolyp tabylatyn ultaralyq kelisim men halyq birligin buzýǵa baǵyttalǵan.
- Sottalýshynyń kinási is materıaldarymen, sonyń ishinde sot-psıhologııalyq jáne fılologııalyq saraptama qorytyndysymen, jaýap alý hattamalarymen jáne zattaı dáleldemelermen dáleldendi.
Is qaraý barysynda azamat T.E. óz kinásin moıyndaǵan joq.
Sot otyrysynyń qorytyndysy boıynsha, qylmystyq is materıaldaryn zerttep, taraptardyń sot jaryssózderinde aıtqan ustanymdaryn eskere otyryp, sot sottalýshyny atalǵan áreketti jasaǵany úshin kináli dep tanydy, - delingen habarlamada.
Qylmystyq Kodekstiń 174-babynyń 1-bóligi boıynsha jaza 2 myńnan 7 myń aılyq eseptik kórsetkishke deıingi mólsherde aıyppul salýdy ne 2 jyldan 7 jylǵa deıingi merzimge bas bostandyǵyn shekteýdi ne sol merzimge bas bostandyǵynan aıyrýdy kózdeıdi.
Sot sheshim shyǵarǵan kezde, sottalýshynyń buryn sottalmaǵany eskerildi, alaıda ol óz quqyqqa qaıshy áreketi úshin ókinish bildirmegen.
Osylaısha, sot sottalýshyny belgili bir qyzmetpen aınalysý quqyǵynan aıyrý túrindegi qosymsha jazamen bas bostandyǵynan aıyrýmen baılanysty emes 5 jyl bas bostandyǵyn shekteý jazasyn taǵaıyndady.
Sot úkimi zańdy kúshine engen joq
