Ǵylymı is-sharaǵa tanymal alashtanýshy ǵalymdar, atap aıtsaq, UǴA akademıgi, «Qazaq gazetteri» JShS bas dırektory Dıhan Qamzabekuly, S.Seıfýllın mýzeıiniń dırektory, mirjaqyptanýshy-professor Marat Ábsemet, EUÝ qazaq ádebıeti kafedrasynyń professorlary, fılologııa ǵylymdarynyń doktorlary Rahymjan Turysbek pen Saǵymbaı Jumaǵul, fılologııa ǵylymdarynyń kandıdaty, qaýymdastyrylǵan professor, Alash qaıratkeriniń urpaǵy Qaıyrbek Kemeńger qatysyp, baıandama jasady.
Dıhan Qamzabekuly Alash avtonomııasy men Túrkistan avtonomııasy arasyndaǵy syndarly qarym-qatynasta M.Dýlatulynyń qaıratkerlik rólin saralasa, Marat Oralbaıuly birtýar tulǵany aqtaý úderisindegi qıyndyqtar men izdenisterge toqtaldy. Gúlnar Mirjaqypqyzy óz qolymen tabystaǵan qaıratker ata-babasy shejiresin kórsetti. Qos ǵalym da 1988 jyldan keıin otandyq ǵylymnyń alashtanýdy ıgerýdegi talabyna, bastamashyl isterge baǵa berdi.
Rahymjan Saǵymbekuly tuǵyrly tulǵanyń ádebı murasynyń jarııalanýy men zerttelýin sóz etse, Saǵymbaı Botbaıuly naqyl sózderin zerdelep, zamana júgin kótergen mánin ashyp kórsetti. Qaıyrbek Kemeńger qalam qaıratkeriniń eldik tujyrymdary ishinde jastarǵa qajetti baǵyttardy kórsetip, tarıhı «Qaıda ediń?» óleńin dombyramen naqyshyna keltirip oryndap berdi.
Ǵylymı semınardyń erekshe tájirıbelik ereksheligi sonda – «Alqa» uıymy músheleri PhD, aǵa oqytýshy Janbota Káripbaıdyń jón silteýimen M.Dýlatuly týraly 150-den astam esse jazǵan. Jıyn barysynda Beksultan Bekbaý, Eljas Orynbek, Gúlsezim Baqytjan, Araılym Dánebek, Áıgerim Qaıyr, Qazyna Baqytjanqyzy syndy stýdentter jumysy úzdik dep baǵalandy. Topjarǵandar esselerin jınalǵan jurtqa oqyp ta berdi. Jastardyń Mirjaqyp poezııasy men prozasyn qanshalyqty qurmet tutatynyn Anar Baqtyǵalı, Jorabek Qasym, Tilekshi Nuraly sekildi stýdentter oqyǵan týyndylarynan da ańǵaryldy.
1-kýrs stýdenti Beksultan Bekenulynyń Mirjaqyp rýhyna arnaǵan óleńindegi myna shýmaqqa zal rıza bolyp, uzaq shapalaq urdy:
«Qarańǵyda jol siltegen jaryq shamy,
Kúlli el ańsap kútken alyp tańy.
О́leńimen ónegeli órnek órip,
Azat kúnge qyrandaı qalyqtady».
Búgingi stýdent-jastar Alash arystarynyń erlik isteri men jazba muralaryn táýelsizdik úshin tógilgen mańdaı ter jáne álemdik deńgeıdegi qaıratkerlik dep sanaıdy.
Aıana Qanatqyzy,
L.N.Gýmılev atyndaǵy EUÝ stýdenti
