Sýret: abai.kz
Is-sharaǵa qatysýshylar Qanysh Sátbaevtyń 10 tomdyq ǵylymı murasymen tanysty. Basylymǵa 1923–1963 jyldar aralyǵyndaǵy ǵylymı eńbekter, onyń ishinde monografııalar, maqalalar, baıandamalar, geologııalyq barlaý esepteri, kartalar, ǵylymı-tehnıkalyq jobalar jáne rýhanı mura salasyndaǵy jumystar engen. Barlyq materıal hronologııa jáne taqyryp boıynsha júıelenip, zamanaýı ǵylymı jáne baspa standartyna sáıkes jasalǵan.
Senat tóraǵasynyń orynbasary Jaqyp Asanov saltanatty jıyn barysynda atqarylǵan jumystyń mańyzy men onyń bolashaq urpaqqa qundylyǵyn atap ótti. Ol Qanysh Sátbaevtyń esimi el tarıhyna altyn áriptermen jazylǵanyn aıta kelip, onyń ǵylymı jáne adamgershilik murasyn keńinen jarııa etý ortaq azamattyq mindetimiz ekenin jetkizdi.
Altynbek Nýhuly ulttyq ǵylym, tarıhı zerde men urpaqtardyń rýhanı sabaqtastyǵyn saqtaýda jobanyń mańyzyna toqtaldy. Onyń aıtýynsha, akademıktiń eńbekteri – jastardyń otandyq ǵylymǵa jáne onyń negizin qalaýshylarǵa degen maqtanysh sezimin qalyptastyratyn ulttyq kodtyń bir bóligi.
«Qanysh Sátbaevtyń 10 tomdyq shyǵarmalar jınaǵy – bul uly ǵalymnyń ǵylymı jolynyń kórinisi ǵana emes, sonymen qatar ulttyq sana-sezimdi qalyptastyrýǵa qosqan mańyzdy úlesi. Bul jınaq – ǵalymdardyń jańa urpaǵyna keń kókjıek ashatyn, jastardyń ǵylymǵa degen ynta-yqylasyn arttyratyn jáne bolashaq aldyndaǵy jaýapkershilik sezimin qalyptastyratyn bilimniń eń qundy kózi. Onyń murasy ǵylymdy odan ári damytý úshin berik negiz jáne jastardy týǵan jerin zertteýge, ashýǵa jáne oǵan qyzmet etýge qulshyndyrady», dep atap ótti depýtat.
Is-sharaǵa Senat pen Májilis depýtattary, Ǵylym jáne joǵary bilim mınıstrliginiń ókilderi, Q.I.Sátbaev atyndaǵy Qazaq ulttyq tehnıkalyq zertteý ýnıversıtetiniń basshylyǵy, memleket jáne qoǵam qaıratkerleri, ǵylym jáne bilim salasyndaǵy jetekshi mamandar qatysty.
Joba Ǵylym jáne joǵary bilim mınıstrliginen qoldaý taýyp, «Halyqaralyq Sátbaev qorynyń» atsalysýymen jáne Q.I.Sátbaev atyndaǵy Qazaq ulttyq tehnıkalyq zertteý ýnıversıtetiniń basshylyǵymen júzege asyp otyr.
