Foto: @EmmanuelMacron
El basshylary beıbit turǵyndardy qorǵaý men zardap shekken aımaqtarǵa gýmanıtarlyq kómektiń kedergisiz jetýin qamtamasyz etýdiń mańyzdylyǵyn atap ótti.
Saıası jıynǵa Mysyr Prezıdenti Abdel Fattah as-Sısı, Fransııa Prezıdenti Emmanýel Makron jáne Iordanııa Koroli Abdalla II qatysty.
Úsh eldiń basshylary 19 qańtarda jasalǵan qaýipsizdik sharalaryn qamtamasyz ete otyryp tutqyndardy bosatý jónindegi kelisimdi jedel iske asyrý qajettigin basa aıtty.
Málimdemede beıbit turǵyndardy, sondaı-aq gýmanıtarlyq qyzmetkerlerdi qorǵaý men gýmanıtarlyq kómekti kedergisiz jetkizýdi qamtamasyz etý – halyqaralyq quqyq boıynsha mindet ekeni jáne bul normalar mindetti túrde saqtalýy kerektigi atap ótildi.
Sondaı-aq, basshylar Batys jaǵalaýy men Shyǵys Ierýsalımdegi jaǵdaıdyń ýshyǵýyna alańdaýshylyq bildirip, eki memleket negizindegi sheshimdi júzege asyrý múmkindigin joqqa shyǵaratyn jáne shıelenisti kúsheıtetin birjaqty áreketterdi toqtatýǵa shaqyrdy.
Olar Ierýsalımdegi qasıetti oryndarǵa qatysty tarıhı mártebesin qurmetteýge úndedi.
Makron, Abdalla II jáne as-Sısı palestınalyqtardy kúshtep kóshirýge nemese palestınalyq aýmaqtardy anneksııalaýǵa qarsy ustanymdaryn rastady, sondaı-aq halyqaralyq qaýymdastyqty Mysyr usynǵan Gaza sektoryn qalpyna keltirý jónindegi arab-ıslam josparyna qoldaý kórsetýge shaqyrdy.
Bul birlesken málimdeme Gazadaǵy jaǵdaıdyń ýshyǵýyna baılanysty jasaldy. Jaqynda bolǵan áskerı qaqtyǵystar kóptegen beıbit turǵyndardyń qaza bolýyna jáne ınfraqurylymnyń jappaı buzylýyna ákeldi. Halyqaralyq qaýymdastyq qaqtyǵystyń shıelenisýine alańdaýshylyq bildirip, ony dereý retteýge baǵyttalǵan naqty sharalardy qolǵa alýǵa shaqyryp jatyr.
