- Halyqaralyq konkıshiler odaǵy (ISU) mánerlep syrǵanaýdan 2027 jylǵy álem chempıonaty Fınlıandııanyń Tampere qalasynda ótetinin resmı túrde rastady. Jarys jalaýy 15-21 naýryz aralyǵynda jelbireıdi. Bıylǵy Gran-prı dodalaryn myna memleketter qabyldaıdy: Fransııa (17–19 qazan), Qytaı (24–26 qazan), Kanada (31 qazan – 2 qarasha), Japonııa (7–9 qarasha), AQSh (14–16 qarasha), Fınlıandııa (21–23 qarasha). Fınaldyq saıys 4–7 jeltoqsan aralyǵynda Japonııanyń Nagoıa qalasynda uıymdastyrylady.
- Taekvondodan Serbııanyń astanasy – Belgradta ótken Serbia Open G1 halyqaralyq týrnırinde elimizdiń quramasy mol oljaǵa keneldi. Kadetter eki altyn, bir kúmis, úsh qola medaldy ıelense, jasóspirimder tórt altyn, bir qolany enshiledi. Nátıjesinde, jalpy esepte jerlesterimiz birinshi orynǵa ıe boldy. Jekelegen taekvondoshylar arasynan Hamzalper Romashkın, Dıas Baıdollaev, Temirjan Tasqyn, Nurperzent Samatuly, Qanat Rahymberdi, Egor Shaptefras qarsylas shaq keltirmeı, bas júldeni oljalady.
- 11–13 sáýir aralyǵynda Fransııanyń Mes qalasynda ústel tennısinen WTT Youth Star Contender Metz halyqaralyq týrnıri ótedi. 19 jasqa deıingi (U19) sportshylar arasyndaǵy jarysta qaraǵandylyq Alan Qurmanǵalıev te óner kórsetedi. Qazaq sportshysy jekelegen synda jáne ulybrıtanııalyq Konnor Grınmen birge juptyq básekede baq synaıdy.
- Fýtboldan ÝEFA Chempıondar lıgasynyń shırek fınalynyń alǵashqy kezdesýleri ótti. Básekelerdiń úsheýinde alań ıeleri jeńis toıyn toılady. Londonnyń «Arsenaly» Madrıdtiń «Realynyń» qaqpasyna jaýapsyz úsh gol soqty – 3:0. «Barselona» Dortmýndtan kelgen «Borýssııanyń» tas-talqanyn shyǵardy – 4:0. Parıjdiń PSJ-sy «Aston Vıllany» esh qınalmaı utty – 3:1. Mıýnhenniń «Bavarııasy» óz alańynda «Interge» ese jiberdi. Qarymta matchtar 16–17 sáýir kúnderi ótedi.
