Úkimet otyrysynyń qorytyndysy boıynsha ótken baspasóz máslıhatynda Erlan Nysanbaev tabıǵattaǵy órtterdiń negizgi sebebiniń biri adamı faktor bolyp sanalatynyn atap ótti.
«Qurmetti jýrnalıster jáne elimizdiń turǵyndary! Men búgingi brıfıngti paıdalanyp, sizderge órt qaýpi joǵary kezeń týraly ótinish aıtqym keledi. Aıtaıyn degenim, ótken jyl óte ylǵaldy boldy, dalada jáne ormandarda byltyrdan qalǵan óte bıik shópter bar, bul bıyl órtke qatysty máselelerdi týdyrýy múmkin. Bul jerde sizderdiń kómekterińiz aýadaı qajet, sondyqtan men ózderińizge júginip, órtke, ásirese dalada ot jaqqanda asa qyraǵy bolýlaryńyzdy suraımyn. Eger siz órtti kórseńiz, jaqyn mańdaǵy arnaıy mekemelerge habarlasyńyz nemese TJM arnaıy telefon nómirine qońyraý shalyńyz», dep atap ótti Erlan Nysanbaev.
Sonymen qatar mınıstr azamattardy orman alqaptarynda da saq bolýǵa shaqyrdy.
«Sizder ormanda, tabıǵatta bolasyzdar. Sizderden ot jaqqan kezde óte muqııat bolýlaryńyzdy suraımyn, óıtkeni órttiń kóbi adam faktoryna baılanysty týyndaıdy», dedi Erlan Nysanbaev.
