Úzdikter daralanǵan doda

Jyldan-jylǵa bul sport túrine qyzy­ǵýshylar qa­ta­ry artyp kele jatqanyn Kaspıı jaǵalaýyndaǵy jarys aıqyndap berdi. Buǵan deıin ótken el birinshilikterinde munshalyq sportshy jınalǵan emes. Qatysýshylardyń rekord­tyq kórsetkishi tirkelgen el birinshiliginiń árbir jekpe-jegi tartyspen ótti. Olaı bolatyn da jóni bar. Sebebi júlde oljalap, jarqyraı kóringen talantty sportshylar alda bolatyn qurlyq dodasyna, sonymen qatar álem chempıonatyna qatysýǵa múmkindik aldy.

Dúbirli dodada Tokıo Olımpıa­dasynyń qola júlde­geri Sofıa Berýlseva, tuńǵysh álem chempıony Móldir Jań­byrbaı, Azııa oıyndarynda chempıon atanǵan, júldeger bolǵan Qaısar Alpysbaı, Ásel Qanaı, Nurqanat Ájiqanov, Dıdar Ámiráli, Danııar Iýldashev syndy tájirıbeli karateshiler jastardyń qary­myn baıqap kórdi.

Erler arasyndaǵy kýmıte dodasynda 55 kg salmaqta Mıras Ábdiqadyr (Jambyl oblysy) chempıon atansa, Atyraý oblysynyń sportshysy Nurbek Kenjebaı 60 kg salmaqta úzdik shyqty. 67 kg salmaq dárejesinde Erkinbek Baıtóreev (Mańǵystaý oblysy), 75 kg salmaqta Nur­qanat Ájiqanov (Aqtóbe oblysy) daralandy. 84 kg salmaqta Shymkent qalasynyń úzdigi Danııar Iýldashev jeńiske jetse, + 84 kg salmaqta synǵa túsken sportshylar arasynda almatylyq Dıas Ulyqbek top jardy.

Áıelder arasyndaǵy tartysta da keıingi býynnyń qarymdy ekeni baıqaldy. Dese de ulttyq quramanyń beldi ókili sanalatyn tájirıbeli sańlaqtar óz bıiginen tómendegen joq. Atap aıtqanda, 50 kg salmaq dárejesinde álem chempıony, Azııa oıyndarynyń kúmis júldegeri Móldir Jań­byrbaı (Qyzylorda oblysy) jeńiske jetti. 55 kg salmaqta mańǵystaý oblysynyń sportshysy Aıshabıbi Sharahan, 61 salmaq dárejesinde Ásel Qanaı (Túrkistan oblysy), 68 kg salmaqta Daıana Darenskaıa (Almaty qalasy) elimizdiń chempıony atandy. 68 kg salmaqtan aýyr tartatyn sportshylar dodasynda Sofıa Berýlseva (Shymkent qalasy) úzdik shyqty.

Tamyz aıynda Qytaıdyń Chendý qalasynda XII Dúnıe­júzilik oıyndar (The World Games) túńligin túredi. Osy álemdik dodada el birinshiliginde olja salǵan sańlaqtarǵa senim artylmaq. 2022 jyly AQSh-tyń Bırmıngem qalasynda ótken Dúnıejúzilik oıyndardan bizdiń sportshylarymyz 1 altyn, 2 kúmis, 1 qola medalmen oraldy. Fınalǵa shyqqan úsh sańlaǵymyzdyń arasynan tek Sofıa Berýlseva ǵana ánuranymyzdy shyrqatty. Sofıa bıyl da jahandyq jarysta sheberligin synap, álemniń tańdaýly karate sheberleri synǵa túsetin alamanda el mereıin asyrýǵa umtylady. Tájirıbeli sportshy Móldir Jańbyrbaı da jankúıerlerin jeńispen qýantýǵa baryn salatynyn jetkizdi.

– Bıylǵy el chempıo­natyndaǵy básekelestik joǵary boldy. Qaty­sýshylardyń qatary qalyń bolýy da kóp jaıtty ańǵartsa kerek. Degenmen tynymsyz tókken terdiń óteýine kezekti ret altyn medal buıyrdy. Alda qysqa merzimge demalys alyp tynyǵamyn. Odan keıin qaıta jattyǵýdy bas­taımyz. Orasan jaýapkershilik, jankúıerlerdiń amanatyn arqalaıtyn dúbirli dodalarǵa qatysamyz. Armanym – álemde teńdessiz ekenimdi pash etip, týymyzdy jelbiretý, – deıdi M.Jańbyrbaı.

Bul jyl jemissiz de emes. Qańtarda Parıjde premer-lıga sanatyndaǵy dúbirli dodanyń birinshi kezeńi ótip, úzdikterimiz 2 kúmis, 1 qola oljalady. Naýryz aıynda Qytaıdyń Hanchjoý qalasynda uıym­dastyrylǵan osy dodanyń ekinshi kezeńinde ulttyq qurama músheleri arasynan 3 sportshymyz kýmıte baǵdarlamasynda 1 kúmis,
2 qola medal enshiledi. Bul saıysqa ár salmaqta álemdik reıtıngte joǵary turǵan 32 sportshy ǵana qatysqanyn qaperge alsaq, az tabys emes. Áıelder arasyndaǵy tartys­ta Móldir Jańbyrbaı, Ásel Qanaı, Sofıa Berýlseva senimdi aqtady.