Uly Otan soǵysyna qatysqan Ivan Matveevıch Begýnovty týǵan kúnimen quttyqtaýǵa Medeý aýdanynyń qorǵanys isteri jónindegi basqarmasynyń, Desanttyq-shabýyldaý áskerleriniń áskerı qyzmetshileri, jergilikti atqarýshy organdardyń jáne «Qarýly kúshterdiń ardagerleri» RQB Almaty fılıalynyń ókilderi barǵan.
Qarýly kúshter ardagerleri qalalyq keńesiniń ókili otstavkadaǵy polkovnık Tólegen Mustafın Qorǵanys mınıstriniń atynan quttyqtaý hatyn oqyp, maıdangerge jeńiske qosqan úlesi men kóp jyldyq eńbegi úshin alǵaýsyz alǵysyn jetkizdi.
«Siz surapyl soǵys synaǵynan óttińiz, al soǵystan keıingi jyldarda Qazaqstannyń ári qaraı órkendeýi, ál-aýqaty artýy úshin qyzmet ettińiz. Ata-babalarymyzdyń sol kezeńdegi erligi esh umytylmaıdy», – dedi T. Mustafın.
Ivan Matveevıch Begýnov 1925 jyly 15 sáýirde Jıtomır qalasynda (Ýkraına) dúnıege kelgen. Toǵyz jasynan bastap onyń tárbıesimen ókil sheshesi aınalysqan. Keıin on alty jasar Ivan jumys istemek bolyp Batys Qazaqstanǵa kóship kelgen.
Soǵys bastalysymen jas jigit Aqtóbe oblysynan Keńes áskeriniń qataryna shaqyryldy. Ýkraına maıdanynda 228-shi gvardııalyq atqyshtar polkiniń quramynda soǵysqan, pýlemetshi bolǵan. Eýropany azat etýge qatysty. Jeńisti ol 1945 jyly mamyrda Pragada qarsy aldy.
Shaıqasta kórsetken batyldyǵy men tózimdiligi úshin sarbaz Qyzyl Tý ordenimen, «Erligi úshin» medalimen jáne basqa da jaýyngerlik nagradalarmen marapattaldy.
Soǵystan keıin Ivan Begýnov Qyzylordadaǵy «Qazqurylysmontaj» kásiporyndarynda, keıinirek Almatydaǵy «Qazelektromontajda» prorab bolyp jumys istedi.
Búginde ardager qyzy Irınamen birge turady. Onyń bes nemeresi, on bir shóberesi jáne bir nemenesi bar. Maıdangerdiń rýhy áli myqty, qımyly shıraq.
