Foto: Aqorda
Sessııa bastalǵaly beri 62 zań qabyldanyp, Senatqa joldanǵan. Onyń ishinde 55 zańǵa Prezıdent qol qoıǵan. Qabyldanǵan normatıvtik-quqyqtyq aktilerdiń qatarynda Sý kodeksi, sondaı-aq qarjy naryǵyn damytý jáne qarjylyq qyzmetterdi tutynýshylardyń quqyǵyn qorǵaý, taýarlardyń shyǵarylǵan elin aıqyndaý, densaýlyq saqtaý jáne oıyn bıznesi týraly mańyzdy zańdar bar.
Búginge deıin depýtattardyń qaraýyna 76 zań jobasy kelip tústi. Prezıdent tapsyrmasyna sáıkes, Salyq, Qurylys kodeksteri men mindetti áleýmettik medısınalyq saqtandyrýǵa, ǵylymı zertteý aýmaqtaryn damytýǵa, qylmystyq-prosestik zańnamany jetildirýge jáne jasandy ıntellektige qatysty zań jobalary boıynsha jumys júrgizilip jatyr.
Májilis tóraǵasy jańa Salyq kodeksiniń birinshi oqylymynyń qorytyndylaryn, Prezıdenttiń Býrabaıda ótken Ulttyq quryltaı otyrysynda bergen tapsyrmalaryn zańnamalyq turǵydan qamtamasyz etý jumystary týraly baıandady.
Qasym-Jomart Toqaevqa depýtattardyń óńirlerge issaparlary kezinde azamattardan túsken aryz-shaǵymdardy memlekettik organdardyń qaraýy, Prezıdenttiń saıası reformalaryn júıeli júzege asyrý máseleleri plenarlyq otyrystarda turaqty talqylanyp kele jatqany jaıynda aıtyldy.
Sonymen qatar Memleket basshysyna Amanat partııasynyń «Qaryzsyz qoǵam», «Aýyl amanaty», «Jer amanaty», «Ákimder mektebi» jobalarynyń júzege asyrylý barysy tanystyryldy.
Budan bólek, Erlan Qoshanov parlamenttik dıplomatııa aıasynda atqarylǵan jumystardyń qorytyndysyna toqtaldy. Atap aıtqanda, Májilis delegasııasy Tashkentte ótken 150-shi Parlamentaralyq odaq assambleıasyna qatysyp, Memleket basshysynyń áleýmettik ádildikti qamtamasyz etýge baǵyttalǵan reformalaryn tanystyrǵan. Mundaı jumys UQShU parlamenttik assambleıasy, Túrki memleketteriniń parlamenttik assambleıasy, TMD parlamentaralyq assambleıasy jáne basqa da baǵyttaǵy halyqaralyq yntymaqtastyq sheńberinde belsendi júrgizilip jatyr.
