Kollajdy jasaǵan – Almas MANAP, «EQ»
Qurmanǵazy aýdanynda kindik qany tamǵan Isim Qoıshıev mıllıondardy maıdan dalasynda qaldyrǵan soǵys bastalǵan jyly 17 jasqa tolǵan eken. Bir jyldan soń soǵysqa attanǵan. Aldymen eki aılyq saperlerdi daıarlaıtyn kýrsqa jiberilgen. Al 1943 jyly Voronej maıdanynda 329-gvardııalyq dıvızııada saperlik mindetin atqarypty. Dnepr ózeni mańynda bolǵan shaıqasta kórsetken erligi úshin III dárejeli «Dańq» ordenimen marapattalǵan. Jeńis saǵaty jaqyndaǵan 1945 jyldyń sáýirinde «Qyzyl Juldyz» ordenine, mamyr aıynda «Germanııany jeńgeni úshin», «Erligi úshin» medaldaryna ıe bolǵan.
Jeńis kúnin maıdan dalasynda qarsy alǵan jaýynger aýylyna birden orala qoıǵan joq. Qazaq soldatyna Ýkraına elinde 1947 jylǵa deıin áskerı boryshyn óteýine týra keledi. Sodan soń elge oralyp, jumys talǵamady. Aldymen qazirgi Qurmanǵazy aýdandyq ishki ister bóliminde qyzmet atqarypty. Keıin 1984 jylǵa deıin Komıntern ujymsharynda, Kırov, Oktıabr keńsharlarynda baqtashy bolyp jumys istedi.
Jaýǵa qarsy shaıqasta erlik kórsetken Isim Qoıshıev beıbit ómirde de batyldyǵymen tanyldy. Sonyń bir dálelindeı, kólikpen sý aıdynyndaǵy muz astyna túsip ketken 3 adamdy qutqaryp qalǵan. Dál osy batyldyǵy úshin «Sýǵa ketkenderdi qutqarǵany úshin» medalimen marapattalǵan.
Jıyrma jasqa tolmaı soǵysqa attanǵan maıdanger 2003 jyly ómirden ótti. Bir jyl buryn maıdan dalasynda qoldanǵan jaýyngerlik sómkesin Qurmanǵazy aýdandyq mýzeıiniń qoryna tapsyrǵan eken. Maıdanger sómkesine adastyrmaıtyn baǵdar kórsetetin kompasyn, botqadan dám tatqanda qoldanǵan qasyǵyn udaıy salyp júrgen. Qıyn kúnderdiń kýásindeı bolǵan bul jádigerler endi mýzeı qorynda saqtaýly tur.
Atyraý oblysy
