«Alpamys» Jetisaıǵa keldi

Jaqynda Jetisaıdyń  Q.Jandarbekov atyndaǵy teatry  «Alpamys batyr» pesasyn sahnalady Jıdeli-baısyn jerinde, Qońyrat degen elinde, dep bastalatyn «Alpamys batyr» jyr-dastanyn, ásirese, sonaý ótken ǵasyrdyń 60-70-jyldary bilmeıtin qazaq joq edi desek ásire aıtpaǵandyq bolar. Sol keńester zamanynyń ózinde qazaqtyń qaharmandyq epostarynyń ishinde «Alpamys batyrdyń» shoqtyǵy bıik bolǵany, kórkemdigi jaǵynan da ózgelerinen erekshelenip turatyny taǵy ras-tyn. Aýyl-aýyldardaǵy úlken kisiler kitapqa qarap jatyq oqıtyn balalarǵa «Alpamys batyr» jyr-dastanyn oqytyp qoıyp rahattana uıyp tyńdaıtyn, jas urpaqqa Alpamystyń batyrlyǵy men erjúrektigin, týǵan eline degen qamqorlyǵyn, patrıottyǵyn úlgi etetin. Bıyl respýblıka jurtshylyǵy Qazaq handyǵy irgetasynyń qalanǵanynyń 550 jyldyǵyn toılamaq. О́tkenimizdi túgendeý, san qatparly tarıhymyzdy tereńdeı zerdeleý arqyly ǵana bolashaǵymyzdy baıandy ete alarymyzdy Prezıdentimiz alqaly jıyndarda talaı ret aıtty da. Munan keń-baıtaq Qazaqstannyń qıyr ońtústiginde oryn tepken maqtaaraldyqtar da shet qalmaq emes. Osynyń jarqyn bir aıǵaǵy retinde osy taıaýda ǵana Jetisaıdaǵy Q.Jandarbekov atyndaǵy drama teatrynda dramatýrg  Ý.Ázimniń «Alpamys batyr» pesasynyń qoıylýy der edik. Ony sahnaǵa shyǵarǵan belgili rejısser, QR mádenıet qaıratkeri Áskerbek Quldanov. Kórkemdik jetekshi men teatr ártisteriniń ózara tereń túsinistigi, tarıhı taqyrypqa degen jaýapkershilik dramalyq shyǵarmanyń kórermen kóńilinen shyǵýyna negiz qalady dep senimmen aıtýǵa bolady. Muny saǵattan astam ýaqyt boıy lyq toly zaldaǵy kórermenderdiń spektakldi tapjylmaı tamashalaǵany-aq aıǵaqtaı túsedi. Ákesi Baıbóriniń jylqylaryn aıdap ketken qalmaq hany Taıshyqtyń eline joryqqa attanǵan Alpamys batyrdyń erlikteri, onyń jat jurtta jaýdyń qolyna túsip, jeti jyl zyndanda jatýy, onan aman-esen shyǵyp eline kelýi kórermendi oılandyrady, tolǵandyrady. Osy jeti jylda Alpamystyń ákesi Baıbóri men anasy Analyqtan bastap búkil el «jasandy» Alpamys – kúńnen týǵan Ultan quldyń ezgisinde bolady. Tipti, Alpamystyń súıgen jary Gúlbarshyn men uly Jádigerge, qaryndasy Qarlyǵashqa zulymdyqtarynda  shek bolmaıdy. Eline kele jatyp Alpamys qyrdyń betkeıinde qoı baǵyp qaıǵy-muńǵa batyp otyrǵan Qultaı qarııaǵa jolyǵady da, mán-jaıdy túgel bilip alady. О́ziniń shyn Alpamys ekenine onyń kózin jetkizgen ol Qultaıdyń kıimderin kıip alyp elge barady. Rasynda da, kúızelgen halqyn, qulǵa aınalǵan áke-sheshesin, baýyrlaryn kóredi. Ultan quldyń áıel etip almaq bolǵanyna kónbeı muny jeti jyl saryla kútken mahabbatyna adal Gúlbarshynnyń erligi men tózimdiligine kóz jetkizedi. Aqyr sońynda jaýyzdyq aýyzdyqtalady, ádildik jeńedi. Kezinde Alpamys batyrǵa adal dos bolyp, eli úshin tipti erlikterge de baryp júrgenderdiń osy jeti jyldyń ishinde ezge, jaýyz Ultanǵa qarsy kele almaı jantyqtarǵa aınalǵany pesada jan-jaqty aıshyqty sýretteledi. Tipti, kórermenge psıhologııalyq turǵydan da oı salady. Ásirese, Gúlbarshyn sulýdyń (ártis Dana Qońyrova) mahabbatqa adaldyǵy, onyń Alpamystyń joryqqa attanar aldyndaǵy «Jeti dúnıe turǵansha kútemin!» degen sertiniń ózi de búgingi jastarǵa tereń oı salady degen senimdemiz. Teatrymyzdyń ártisteri kórermen kóńilinen shyǵý úshin baryn salyp oınady. Ásirese, Alpamys batyrdy beınelegen jas ártis О́mirzaq Aıdarov pen Gúlbarshyndy somdaǵan Dana Qońyrovaǵa, saqaý Badamshany kelistire keltirgen ártis Marııash Jumadillaevaǵa, Ultan quldyń ishki jan dúnıesin asha bilgen ártis Baqytjan Qapparovqa, Qarajandy qatyryp oınaǵan Batyrhan Qazybekovke, Analyqty oınaǵan QR mádenıet qaıratkeri Ulbosyn Bazarbaevaǵa kórermender ystyq yqylaspen qol soqty. Sondaı-aq, N.Anasov (Qultaı), Baqyt Aıdarov (Jyraý), Asylhan Qoldasov (Baıbóri), Móldir Qapparova (Qarlyǵash) Perdehan Sadyqov (Parmanqul), on jasar mektep oqýshysy Azamat О́tebekov (Jádiger), t.b. da ortaq istiń oraıyn keltirýge, ıaǵnı pesanyń kórermen júreginen oryn alýyna ózindik úlesterin qosa bildi. Al sahnanyń bezendirilýinde teatr sýretshisi, QR mádenıet qaıratkeri Taǵaıbek Baıdarbekov te jemisti eńbek etti. Ábdiálim TILEÝBEKOV.