Is-sharaǵa Parlament depýtattary, ortalyq memlekettik organdardyń basshylary, sondaı-aq til bilimi salasyndaǵy jetekshi ǵalymdar men sarapshylar qatysty.
Otyrys barysynda 2023–2029 jyldarǵa arnalǵan Til saıasaty tujyrymdamasyn iske asyrýdyń negizgi baǵyttary talqylandy. Ásirese, memlekettik tildiń ult biregeıliginiń irgetasy jáne damýdyń strategııalyq resýrsy retindegi rólin nyǵaıtý máselelerine erekshe nazar aýdaryldy.
Ǵylym jáne joǵary bilim mınıstri Saıasat Nurbek til saıasatynyń tujyrymdamalyq mindetterin iske asyrý barysy týraly baıandady. Atap aıtqanda, qazaq tilin ǵylym tili retinde damytý, bilim berý ádistemelerin jetildirý jáne memlekettik tildegi sapaly kontenttiń sanyn arttyrý máseleleri qozǵaldy.
Sıfrlyq bastamalardy engizý jumystaryna: qazaq tilindegi KazLLM jasandy ıntellektti ázirleý, erekshe qajettilikteri bar adamdarǵa arnalǵan ekran dıktoryn jasaý, sondaı-aq «Qazaq tiliniń ulttyq sózdik qory» memlekettik aqparattyq júıesin iske qosýǵa basa nazar aýdaryldy.
Otyrys qorytyndysynda komıssııanyń 2025 jylǵa arnalǵan jumys jospary bekitildi. Ermek Kósherbaev aldaǵy jumystyń basym baǵyttaryn atap ótip, tildik ortany júıeli jańǵyrtýǵa, sıfrlyq dáýirdiń syn-qaterlerin eskere otyryp, normatıvtik-quqyqtyq bazany beıimdeýge kúsh salýdy tapsyrdy.
Qabyldanǵan sharalardy iske asyrý ulttyń tildik kapıtalyn nyǵaıtýǵa jáne qazaq tiliniń jańa tehnologııalyq jaǵdaıda ornyqty damýyn qamtamasyz etýge múmkindik beredi.
