Sýret: abu.org.my
Covid pandemııasy kezinde biz ulttyq habar taratý ortalyqtarynyń qanshalyqty mańyzdy ekenin tereń uǵyndyq. Osyndaı tótenshe jaǵdaılarda halyqqa shynaıy, resmı ári obektıvti aqparat taratý – eń jaýapty mindet.
Jýrnalıstıkanyń kásibı etıkasy qazirgi jasandy ıntellekt zamany týyndaǵan shaqta burynǵydan da ózekti bola tústi. Aqparat taratýshylar men yqpaldy blogerlerdiń árbir málimeti aýdıtorııa sanasyna áser etedi. Biraq biz árbir aqparatty jeke baqylap, teksere almaımyz. Sol sebepti buqaralyq aqparat quraldaryna artylatyn jaýapkershilik óte zor. Ár azamat óziniń qandaı aqparatqa senetinin saralaı alýy kerek.
Búginde feık pen manıpýlıasııaǵa toly medıa keńistikte eń basty másele – aqparattyń senimdiligi. Bul rette ınflıýenserlerdiń de róli artyp keledi. Olar – zamanaýı pikir qalyptastyrýshylar. Biraq olardyń taratyp jatqan kontenti árdaıym obektıvti bola bermeıdi. Sondyqtan ulttyq habar taratý ortalyqtarynyń róli – halyqty durys, naqtylanǵan aqparatpen qamtamasyz etý.
Bizdiń uıymnyń quramynda «AJN» (Asia Journalism Network) dep atalatyn jańalyq taratý ortalyǵy bar. Bul platforma arqyly biz múshe memleketterdiń ulttyq ortalyqtarynan alynǵan aqparattardy kúndelikti taratyp otyramyz. Derekti fılmder, jańalyqtar, mádenı jobalar arqyly biz tek bir aımaqpen shektelmeımiz – Ortalyq Azııadan bastap, Karıb aımaǵy men Afrıka elderine deıin qamtımyz.
Tildik kedergini biz tehnologııanyń kómegimen sheship kelemiz. Transkrıpsııa, avtomatty aýdarma syndy quraldardy qoldana otyryp, túrli ulttardyń birin-biri túsinýine jaǵdaı jasap otyrmyz.
Qorytyndylaı kele, biz Azııa habar taratý odaǵyna barlyq memleketti qosylýǵa shaqyramyz. Medıa kóshbasshylarmen birlese jumys istep, tájirıbe almasýǵa, aqparattyq qaýipsizdik pen sapany birge qamtamasyz etýge daıynbyz.
Ahmed NADIM,
«Asian-Broadcasting Union» bas hatshysy
