Kezdesý barysynda Qulbek Ergóbek ádebıet, ǵylym, rýhanııat, syn mádenıeti jáne kitaphana isi syndy ózekti máselelerge toqtalyp, óz ómiri men ustazdar taǵylymyn tebirene áńgimeledi. «Joǵary mekteptegi ustazdarym erekshe boldy. Birinshi kýrsta Beısenbaı Kenjebaevty taýyp alyp, shákirti ǵana emes, perzentindeı bolyp kettim. Ǵylymdaǵy jolym osydan bastaldy» dep áserli áńgime órbitti.
Kezdesýde professor qazirgi qazaq balalar ádebıetiniń jaǵdaıyna alańdaýshylyq bildirdi. Ádebıetpen aýyzdanbaǵan, ertegi estimegen urpaqtyń bolashaǵy kúńgirt.
«Balalar ádebıeti quldyrady. Alpysynshy, jetpisinshi jyldardaǵy bıik deńgeıden búgingi jazýshylar alystap ketti. Balalar jazýshysy bolyp qalyptaspaıdy – balalar jazýshysy bolyp týady. Ondaı tulǵalar bizde saýsaqpen sanarlyq. Jańa dáýirdiń Aıtolmandary, Jánibek Káribozınderi, Jaqan Smaquldary joq», – dedi ol. Sondaı-aq Memleket basshysy Qasym-Jomart Toqaevtyń balalar ádebıetine erekshe mán berip, 2021 jyldy – Balalar ádebıetiniń, al 2022 jyldy – Balalar kitabynyń jyly dep jarııalaǵanyn quptady.
Qulbek Ergóbektiń rýhanııatqa qosqan taǵy bir úlesi – onyń jeke kitaphanasy. Ol jıyrma jyldan beri Túrkistanda túrki halyqtary kitaphanasyn damytyp keledi. Qazir onyń qorynda 24 tilde 6000-nan astam kitap bar. Bul – qazaq ǵylymynyń erteńi úshin jasalǵan tarıhı eńbek.
Kezdesýde sóz alǵan fılologııa ǵylymdarynyń doktory, professor Serik Negımov Qulbek Ergóbektiń qazaq rýhanııatyndaǵy ornyn joǵary baǵalady. «Ol qoǵamnyń eń kókeıkesti, eń kúrdeli, eń jaraly taqyryptaryn ashyq kóterdi. Ishimizde júrgen, biraq aıta almaǵan máselelerdi ashyq, naqty jetkizdi», dedi S.Negımov. Sonymen qatar fılologııa ǵylymdarynyń doktory, professor Turysbek Raqymjan: «Qulbek baýyrymyzdyń eki erligi men bes baǵyty bar. Onyń birinshisi – Beısenbaı Kenjebaev sekildi alyp ustazdyń rýhanı murasyn tiriltip, týǵan balasyndaı ómirin arnaýy. Ekinshisi – Sábıt Muqanovtyń shyǵarmashylyq álemine ómir boıy adal bolýy. Bul ekeýi – sırek kezdesetin rýhanı erlik. Al bes baǵytqa kelsek, Qulbek Ergóbektiń qazaq balalar ádebıetine sińirgen eńbegi, ádebı damýǵa qosqan úlesi, syn salasyndaǵy qyzmeti, qazirgi ádebıetten qol úzbeýi jáne ádebı úderispen úzdiksiz baılanysy – munyń bári qadirleýge laıyq qyzmet», dedi.
Kezdesý sońynda Memlekettik Eltańbanyń avtory, sáýletshi-professor Jandarbek Málibekuly Qulbek Ergóbekke Memlekettik Eltańba beınelengen arnaıy tósbelgini saltanatty túrde tabystady.
Erlan KIIKBAI,
EUÝ stýdenti
