Foto: Aqorda
«Qazir Aqtaýǵa jylýdy «MAEK» kompanııasy beredi. Biraq oblys ortalyǵy tez ósip jatyr. Qalany jylýmen tolyq qamtamasyz etýge kásiporynnyń qýaty jetpeıdi. Byltyr Aqtaýda uzyndyǵy 12 shaqyrym bolatyn jylý jelisi salynyp, jańǵyrtyldy. Nátıjesinde qalaǵa jylýdyń durys jetýine múmkindik týdy. Osy baǵyttaǵy jumysty jalǵastyrý kerek. Byltyr oblysta 846 myń sharshy metr turǵyn úı salyndy. Bul – jospardan 20 paıyzǵa artyq. Degenmen oblystaǵy turǵyn úı qorynyń 7 paıyzy ábden eskirgen», dedi Prezıdent.
Qasym-Jomart Toqaevtyń aıtýynsha kóp páterli 177 úı kúrdeli jóndeýdi qajet etedi. Sondyqtan turǵyn úılerdi jańǵyrtý máselesine aıryqsha nazar aýdarý kerek.
«Maǵan túsken aqparat boıynsha Aqtaýda úleskerler qarjy salǵan 6 úıdiń qurylysy bitpeı tur. Orynsyz, ıaǵnı beı-bereket salynǵan qurylys nysandary da bar. Bul máselelerdi sheshý úshin Úkimet ákimdikpen birge naqty sharalar qabyldaýy kerek», dedi Prezıdent.
Sondaı-aq Memleket basshysy Jańaózendegi gaz óńdeý zaýyty qurylysynyń keshigýi – Úkimettiń óreskel olqylyǵy ekenin atap aıtty.
«Men buǵan deıin Jańaózendegi gaz óńdeý zaýytyn 2024 jylǵa qaraı iske qosý týraly tapsyrma berdim. Biraq túrli rásimder sozylyp, merdigermen kelisim-shartqa byltyr ǵana qol qoıyldy. Sonyń saldarynan zaýytty iske qosý merzimi 2027 jylǵa qalyp qoıdy. Bul – Úkimettiń óreskel olqylyǵy. Úkimet osy máseleni qatań baqylaýǵa alýy kerek», dedi Memleket basshysy.
