Foto: NUR.KZ/Petr Karandashov
Aıta keteıik, qazirgi tańda oblysta 77 myń shaǵyn jáne orta bıznes nysany jumys istep tur. Olar 150 myń adamǵa jumys berip otyr. Byltyr kásip ıeleri shyǵaryp jatqan ónim kólemi 270,5 mıllıardqa ósip, 2,2 trıllıon teńgege jetken.
«Bıyl aımaqtaǵy shaǵyn jáne orta bıznesti qoldaý úshin memlekettik bıýdjetten 16 mıllıard teńgeden astam qarjy bólinetin boldy. Qazirdiń ózinde 12,5 mıllıard teńge bólinip, 150 jobaǵa qoldaý kórsetilgen. Budan bólek, jaqyn arada «Mangystau Business» baǵdarlamasy iske qosylady. Osy aýqymdy jumystyń aıasynda 30 jańa jobaǵa qarjy bólinbek, jalpy somasy 1,5 mıllıard teńge bolady. О́zderińiz bilesizder, oblystyń óz ereksheligi bar. Atap aıtqanda, munaı óndirisiniń basym bolýy, shóldi jerde turǵany, sý tapshylyǵy, azyq-túlik ımportyna táýeldilik. Sondyqtan jospardaǵy barlyq sharýany tıimdi iske asyrý úshin memlekettik organdardyń bári jumyla jumys isteýi kerek», dedi Prezıdent.
Sonymen qatar Memleket basshysy «Aqtaý teńiz porty» arnaıy ekonomıkalyq aımaǵy oblystaǵy kásipkerlikti damytýǵa erekshe serpin beretin ortalyq bolýǵa tıis ekenin atap ótti. Qazir onda 22 jańa joba júzege asyrylyp jatyr. Arnaıy ekonomıkalyq aımaqqa salynǵan ınvestısııanyń jalpy kólemi – 337 mıllıard teńge boldy, sonyń teń jartysy – shetel ınvestısııasy.
«Bıyl arnaıy ekonomıkalyq aımaqtyń aýmaǵyn jeti ese ulǵaıtý josparlanyp otyr, ıaǵnı, 3,7 myń gektardan 26,5 myń gektarǵa deıin. Bul – oryndy sheshim. Ákimniń de ekonomıkalyq aımaqqa qatysty usynystary bar. Halyq tutynatyn taýarlardy, sonyń ishinde azyq-túlik óndirisin ekonomıkalyq qyzmet túrine qosýǵa bolady. Degenmen joǵary sapaly ónim shyǵaryp, jańa jumys oryndaryn ashýǵa múmkindik beretin óńdeý sektoryna basymdyq berý qajet. Úkimet pen ákimdik osy salaǵa egjeı-tegjeı taldaý jasap, tıimdi jumys júrgizýge tıis. Qaǵazbastylyq bolmaýy kerek, naqty, nátıjeli jumys qajet», dedi Qasym-Jomart Toqaev.
