Foto: Aqorda
Prezıdenttiń málimetinshe, týrızm – aımaq ekonomıkasynyń munaı-gaz salasynan keıingi mańyzdy sektory. Byltyr oblysqa shetelden 43 myń týrıst kelgen. Elimizdiń basqa aımaqtarynan kelgen qonaqtardyń sany 460 myńǵa jýyqtap, sońǵy úsh jylda jalpy týrıster sany 1,5 ese artqan.
«Jazda qonaq úılerdiń 90 paıyzdan astamy bos bolmaıdy. Beket Ata jerasty meshitine, Bozjyra shatqalyna, Aıraqtydaǵy «Qamaldar alqabyna» jáne Toryshtaǵy domalaq tastarǵa týrıster óte kóp barady. Mańǵystaýǵa keletin árbir onynshy adam osy nysandarǵa arnaıy soǵady. Týrısterge, ásirese, múmkindigi shekteýli jandarǵa qolaıly jaǵdaı jasaý qajet. Men muny únemi aıtyp júrmin. Osy baǵyttaǵy jumysty jalǵastyrý qajet. Beket Ata jerasty meshitine kóterilý úshin avtomatty qondyrǵy ornatý týraly usynysty muqııat qaraý kerek. Jalpy, týrıstik nysandarǵa sondaı júıe ornatý álemdik tájirıbede bar. Biraq kesene – halqymyz úshin kıeli oryn. Sondyqtan jurtshylyqpen, túrli mamandarmen aqyldasyp, jan-jaqty oılastyryp sheshim qabyldaǵan jón. Men bul usynysty qoldaımyn», dedi Memleket basshysy.
Prezzıdent Aqtaýdyń kólik-logıstıka jáne týrızm turǵysynan erekshe áleýetke ıe ekenin atap ótip, teńiz týrızmine erekshe nazar aýdarý kerektigin aıtty.
«Bes eldiń teńiz aılaqtary bir-birine jaqyn ornalasqan. Reseı, Iran jáne Kavkaz elderiniń mıllıonnan astam turǵyny bar 10 qalasynan týrıster shaqyrýǵa bolady. Ystanbul, Antalıa, London, Máskeý, Astrahan, Tbılısı, Baký jáne basqa da qalalardan shyǵatyn ushaqtardyń tranzıttik dálizderi osy jerde toǵysady. Munyń bári týrızmniń qarqyndy damýyna jol ashady. Aqtaý portynda jańa teńiz portyn salý qajettigi týyndap otyr. Aılaqtardy jolaýshy tasıtyn kemeler toqtaýǵa bolatyndaı etip jańǵyrtý kerek», dedi Qasym-Jomart Toqaev.
Sonymen qatar, Memleket basshysy týrızm salasyna jeke ınvestısııa tartý máselesine toqtaldy. Onyń aıtýynsha, Úkimet «Mańǵystaý» týrıstik aımaǵyn damytýdyń keshendi josparyn shuǵyl túrde bitirýi kerek. Maýsym aıynda bul jospardy maquldanady.
«Oblys ákimdigi Úkimettiń qoldaýymen osy salaǵa jeke ınvestısııa tartý máselesin pysyqtaýy qajet. Taǵy bir másele, bul – is-sharalar týrızmi (Event tourism). Aqtaý túrki áleminiń mádenı astanasy mártebesin aldy. Jaqynda ashylý rásimi jaqsy ótti. Bul is-sharaǵa óz azamattarymyzben qatar, túrkitildes elder de zor qyzyǵýshylyq tanytty. Aldaǵy ýaqytta 30-dan astam is-shara ótkiziledi. Osynyń bári aımaqqa týrıster tartýǵa jol ashýǵa tıis. Bul jumysty belsendi júrgizý qajet. Jalpy, aımaqqa shetel ınvestısııasy turaqty kelip jatyr. Biraq onyń úshten ekisi munaı-gaz sektoryna tıesili. Sondyqtan basqa da salalarǵa belsendi túrde ınvestor tartý qajet», dedi Prezıdent.
