Mıhaıl Iаkovlevıch Antonıýk 1935 jyly 12 naýryzda Ýkraınadaǵy Volyn oblysynyń Týlıchev aýylynda dúnıege kelgen. 1961 jyly ol Lvov qoldanbaly jáne sándik óner ınstıtýtynyń monýmentaldy óner fakýltetin támamdap, sol jyly-aq Qazaqstanǵa qonys aýdarady. Sodan beri Selınograd (qazirgi Astana) qalasyndaǵy monýmentaldy ónerdiń damýyna zor úles qosyp, qoǵamdyq ǵımarattar men qurylystardy vıtrajdar men mozaıka týyndylarymen bezendirgen jetekshi sheberlerdiń birine aınaldy.
1963 jyly Mıhaıl Antonıýk KSRO Sýretshiler Odaǵyna múshelikke qabyldanyp, keıinnen Qazaqstan Sýretshiler odaǵynyń Selınograd bólimshesin uıymdastyrýshylardyń biri boldy. Onyń mozaıkalyq jáne vıtrajdyq týyndylary Qazaqstannyń túrli qoǵamdyq jáne mádenı nysandaryn kórkeıtip, ózi kóptegen oblystyq, respýblıkalyq jáne búkilodaqtyq kórmelerge qatysqan. 1991 jyly sýretshige «Qazaqstan Respýblıkasynyń eńbek sińirgen óner qaıratkeri» qurmetti ataǵy berilgen.
Kórmeniń ashylý saltanatyna mádenıet pen óner salasynyń tanymal ókilderi qatysty. Atap aıtqanda, «Eýrazııa» telearnasy bas dırektorynyń birinshi orynbasary Svetlana Jalmaǵambetova, Qazaqstannyń eńbek sińirgen qaıratkeri, Tatarstannyń halyq sýretshisi, Memlekettik syılyqtardyń laýreaty Kamıl Mýllashev jáne Qazaqstannyń eńbek sińirgen sáýletshisi, Halyqaralyq sáýlet akademııasynyń akademıgi Vasılıı Toskın. Qonaqtar sýretshiniń keńestik kezeńdegi shyǵarmashylyǵy, mozaıkalyq týyndylary men vıtrajdary týraly jyly estelikterimen bólisti.
Kórme kýratory, sýretshiniń uly Iаroslav Antonıýk: «Ákemniń týyndylary — ár adamnyń ómirindegi mańyzdy jáne ózgermes sátterdi beıneleıdi», — dep kórermenderdi ekspozısııamen jaqynyraq tanysýǵa shaqyrdy.
Ekspozısııada qazaq halqynyń tarıhy men ulttyq bolmysyn beıneleıtin, oıý-órnek elementterimen kómkerilgen kartınalar, mozaıkalar men vıtrajdar qoıylǵan. Bul týyndylar — tereń maǵynaǵa, kompozısııalyq úılesimge jáne kórkemdik yrǵaqqa toly.
«О́z dáýiriniń sýretshisi» kórmesi 2025 jylǵy 11 sáýir men 11 maýsym aralyǵynda QR Ulttyq mýzeıiniń 7-qabatyndaǵy ýaqytsha kórmeler zalynda kelýshilerge usynylady.
