Foto: Mádenıet jáne aqparat mınıstrligi
Qazaqstannyń resmı delegasııasyn QR Mádenıet jáne aqparat mınıstri Aıda Balaeva bastap bardy. Armenııa astanasyndaǵy mádenı kúnder baǵdarlamasy qazaqstandyq fılmder kórsetiliminen bastaldy. Búgin «Moskva» kınoteatrynda kórermenderge rejısser Rústem Ábdirashevtiń «Qazaq handyǵy. Altyn taq» atty tarıhı kınotýyndysy men Farhat Sháripovtiń «Stop, noch» fılmi usynyldy.
Saltanatty jıynda Ulttyq kınony qoldaý memlekettik ortalyǵynyń basqarma tóraǵasy Qurmanbek Jumaǵalı quttyqtaý sóz sóılep, qazaqstandyq kınoóndiristiń damý mańyzdylyǵyna toqtaldy. Ol Memleket basshysynyń Mádenıet jáne aqparat mınıstrliginiń qyzmetine qatysty zańǵa qol qoıǵanyn atap ótti. Zańda birqatar jańa erejeler qamtylǵan. Atap aıtqanda, Sháken Aımanov atyndaǵy «Qazaqfılm» kınostýdııasy damýynyń jańa kezeńi bastaldy. Eldegi kınofılmderdi qarjylandyrýdyń jalpy kóleminiń keminde 30 paıyzy tikeleı atalǵan kınostýdııaǵa baǵyttalady. Bul sheshim stýdııa jumysynyń qarjylyq turaqtylyǵy men tıimdiligin qamtamasyz etedi.
Sonymen qatar, Qurmanbek Jumaǵalı kınojobalardy irikteýdiń jańa erejeleri jaıly aıtyp, qazirgi qazaq fılmderi armıan kórermeniniń kóńilinen shyǵatynyna senim bildirdi.
«Armenııadaǵy Qazaqstan kınosynyń kúnderi – elderimiz arasyndaǵy yntymaqtastyqty, ózara túsinistikti jáne dostyq baılanystardy nyǵaıtýda mańyzdy platforma. Qazaq kınoónerimen jaqyn tanysýǵa múmkindik týǵanyna erekshe qýanyshtymyz. Qazaq kınosy – bul tereń fılosofııa, bolashaqqa batyl kózqaras. Biz Qazaqstandaǵy kınoónerdiń damý barysyn zor qyzyǵýshylyqpen baqylap otyrmyz. Búgingi kórsetilimder mádenıetterimiz arasyndaǵy altyn kópirge aınalady dep senemiz», dedi Armenııa Kıno qorynyń dırektory Davıd Banýchıan is-sharanyń ashylý saltanatynda sóılegen sózinde.
Erteń kórermenderge taǵy eki týyndy – rejısser Serikbol О́tepbergenovtiń «Patrıottar ýaqyty», Danııar Ibragımovtiń «Búrkit» fılmderi usynylady.
Mádenı kúnder aıasynda Qazaqstannyń resmı delegasııasy Erevan memlekettik ýnıversıtetindegi Abaı atyndaǵy qazaq tili, tarıhy jáne mádenıeti ortalyǵyna, sondaı-aq Armenııanyń Ulttyq kitaphanasyna bardy. Munda qazaq ádebıeti buryshy ornalasqan. Delegasııa kitap qorymen tanysyp, qazaqstandyq qalamgerlerdiń onnan astam kitabyn tartý etti. Olardyń qatarynda — Qaırat Aıtbaevtyń «Sal dombyra», Nurbaı Bektursynovtyń «Otan qorǵaýshy», Farıza Ońǵarsynovanyń «Tańdamaly», Qazaqstan Prezıdenti Qasym-Jomart Toqaevtyń «Nur men kóleńke» eńbegi jáne basqa da birqatar basylymdar bar.
Mádenı kúnder 19 sáýir kúni Aram Hachatýrıan atyndaǵy konsert zalynda ótetin Gala-konsertpen qorytyndylanady. Bul keshke qazaqstandyq estrada juldyzdary, zııaly qaýym ókilderi, dıplomattar, ǵalymdar, jazýshylar men óner qaıratkerleri qatysady.
