Sýret: kpl.kz
Jaqynda klýbtyń bir top qyzmetkeri jyl basynan beri jalaqy tólenbegeni jóninde úndeý jasap, oblys ákimi Serik Shápkenovten kómek surady. Jalpy, Atyraý oblystyq dene shynyqtyrý, sport jáne týrızm basqarmasy baspasóz qyzmeti málim etkendeı, klýbqa qatysty osy kezge deıin túıini tarqatylmaı kele jatqan birneshe másele bar.
«Atyraý oblystyq prokýratýrasy «Atyraý» fýtbol klýby» JShS-nyń 2022–2024 jyldary aralyǵyndaǵy qyzmetin tekserip, kóptegen zańbuzýshylyqty anyqtady. Máselen, 2023 jylǵy aqpanda shetel fýtbolshysyna 500 myń eýronyń transferi jasalyp, onyń 420 myń eýrosy úshinshi tulǵaǵa (Reseı Federasııasynyń azamaty) negizsiz aýdarylǵan. Deldalmen kelisimshart mámileden eki apta buryn jasalǵan. Bul kelisimsharttyń zańdylyǵyna kúmán týdyrady. 2024 jylǵy jeltoqsanda klýbqa fýtbol federasııasynan 65 mıllıon teńge alynǵan. Atalǵan qarjynyń 20,4 mıllıon teńgesi esepten negizsiz shyǵarylǵan. 30 mıllıon teńgeni jetkizilmegen taýarlar úshin aýdarǵan», dep habarlady basqarmanyń baspasóz qyzmeti.
Basqarmanyń málimetinshe, fýtbol klýby joǵaryda kórsetilgen jyldar aralyǵynda 662,7 mıllıon teńge kiris tapqan. Degenmen kiristiń 132,5 mıllıon teńgesi bıýdjetke aýdarylmaǵan.
«Quryltaıshyǵa qarjy esebi júıeli túrde tapsyrylmaǵan. Fýtbolshylar men jattyqtyrýshyǵa tólenetin jalaqynyń mólsherin lımıtten asyrý deregi bar. Máselen, fýtbolshylarǵa 2 mıllıon teńge lımıttiń ornyna 3 mıllıon, jattyqtyrýshyǵa 4 mıllıon teńge tólengen. «Sýdoremontnık» stadıony, komanda avtobýsy jalǵa alý kelisiminsiz zańsyz paıdalanylǵan. Jabdyqtardyń baǵasyn kóterip, 180-200 myń teńge turatyn kir jýatyn tehnıkanyń naryqtaǵy qunyn 1,8 mıllıon teńge dep kórsetken. Basqarmaǵa bıylǵy qańtarǵa rastaıtyn qujattarsyz, shyǵyndardyń aldyn ala kelisiminsiz 233 mıllıon teńgege shot berildi», dep málimdedi baspasóz qyzmetinen.
Klýb 2018 jyldyń aqpan aıynda senimgerlik basqarýǵa berilgen. Senimgerlik basqarýdy «Atyraý» kásibı sport klýby» qoǵamdyq qory qolǵa alǵan. Alaıda osy jyldar ishinde klýbtyń qyzmetinde júıeli problemalar týyndaǵany baıqalady. Onyń ishinde quryltaıshylar men basshylyqtyń jıi aýysýy, turaqty sporttyq kórsetkishterdiń bolmaýy, qarjy-sharýashylyq qyzmetindegi ashyqtyqtyń jetkiliksizdigi sekildi kemshilikter bar. Legıonerler sany negizsiz artqan, bıýdjettiń ashyqtyǵy saqtalmaǵan, naqty esep berilmegen. Osyndaı sebepterge baılanysty oblystyq prokýratýranyń usynysymen klýbty memlekettiń basqarýyna qaıtarý týraly sheshim qabyldandy. Bul qarajattyń maqsatty jumsaýǵa baqylaýdy kúsheıtýge, óńirdiń fýtbol ınfraqurylymy men kadrlyq áleýetin damytýǵa múmkindik beredi.
Klýb qyzmetin jaqsartý maqsatynda arnaıy strategııa ázirleý josparlanyp otyr. Strategııada birinshiden, ashyqtyqqa nazar aýdarylady. Ekinshiden, turaqty basqarýǵa, úshinshiden, jastar men balalar fýtbolyn damytýǵa basa mán beriledi.
«Atyraý» fýtbol klýby basshylyǵynda da ózgerister bolǵany týraly resmı aqparat tarady. Klýbtyń quryltaıshylary bolǵan Jasyn Habıbýllın men Serjan Manasov óz ornyn bosatty. Quryltaıshylar quramyna Temirhan Sársenǵalıev pen Dııas Eleýsinov keldi. Sondaı-aq klýb dırektory Jandos Bektemir men bas menedjer Manarbek Erjanov ta óz qalaýymen qyzmetinen ketti. Naýryzdyń sońynda Dıdar Sydyqbek «Atyraý» fýtbol klýbynyń bas menedjeri qyzmetine kirisken edi. Biraq arada 15 kún ótkende ol da qyzmetinen ketýdi jón kórgenin málim etti. Ol buryn «Qyzyljar», «Astana-1964», «Aqtóbe», «Ordabasy» klýbtarynda oınady. Fýtboldaǵy mansabyn aıaqtaǵan soń «Progress KZ» taldaý qyzmetiniń jetekshisi, «ITS» AQ baqylaý bóliminiń sanat mamany, «Qazaqstan Respýblıkasy Tuńǵysh Prezıdenti – Elbasy qorynyń» jobalyq keńse úılestirýshisi laýazymdaryn atqarǵan. Keıin SD Family Group dırektory, Qazaqstan Medıa-fýtbol federasııasynyń prezıdenti bolǵan. Budan soń fýtbol federasııasynyń «Alań» ınfraqurylymdyq jobasynyń keńesshisi retinde basshylyq qyzmette tájirıbe jınaǵan.
«О́mirdegi eń basty ustanym – ózińe, ózgelerge adal bolý. Men bul qalany, fýtbol klýbyna qatysy bar adamdardyń bárin jaqsy kóremin. Eshkim qyzmetten ketýge májbúrlegen joq. Az ǵana ýaqytta klýb pen aımaq basshylyǵy arasyndaǵy qarym-qatynasty jaqsarttym dep bilemin», deıdi D.Sydyqbek.
Mine, «Atyraý» fýtbol klýbynyń qazanynda osyndaı tolǵaqty máseleler qaınap jatyr. Munaıly óńirdiń turǵyndary bıýdjetten qomaqty qarjy bólinetin komandanyń adymy ashylǵanyn qalaıdy. Alaıda ala dop qýǵan ujymnyń júldeni oryndarǵa qashan ıe bolary ázirge belgisiz.
Atyraý oblysy
